« bullarium-franciscanum-4384 »

Dilectis filiis ‥ ministro ac universis custodibus et gardianis fratrum ordinis Minorum et eisdem fratribus per provinciam Daciae constitutis.

Devotioni congruit, caritati concordat et consonat rationi, ut hii, qui se misericordiarum Patri et Domino pro eius miserationis gratia impetranda in humilitatis spiritu perpetuo servituros regularis professionis astricti vinculo dedicarunt, in huiusmodi eorum honesto et salubri proposito foveantur nec in illo aliquatenus perturbentur, sed pacifice permittantur excellentiae divinae quietis mentibus pensum exsolvere debitae servitutis. Sane dilectus filius Kanutus Aghonis de Ripis, monachus monasterii Locidei Cisterciensis ordinis Ripensis diocesis, sua nobis humili et devota insinuatione monstravit, quod olim ipse ab observantia et obedientia vestri ordinis, in quo se vinculo professionis astrinxerat, per litteras venerabilis fratris nostri Gaucelini episcopi Albanensis, poenitentiariae nostrae curam gerentis, auctoritate nostra et de speciali nostro mandato, super hoc vivae vocis oraculo sibi facto, penitus absolutus, ad ordinem Cisterciensem de licentia ipsius episcopi et auctoritate praedicta sibi a nobis concessa sine mora se transtulit, in quo pluribus annis extitit iam professus et in dicto monasterio laudabiliter conversatus. Verum, quia vos vel aliqui vestrum minus veraciter asserentes, huiusmodi absolutionem et licentiam per eundem episcopum auctoritate et de mandato nostris praedictis habitas et factas non valere, pro eo quod de potestate sua, quam super hoc a nobis receperat, sub bulla nostra non apparent absolutio et licentia praelibatae, dictum Kanutum temere capere necnon ad eundem vestrum ordinem, de quo auctoritate et mandato praefatis absolutus ut praefertur fuerat, reducere nitimini, et tam Kanutum quam monasterium praedicta per impetitionem huiusmodi vexatis multipliciter et etiam perturbatis. Cum itaque idem Kanutus intendat, ut asserit, in ordine Cisterciensi iamdicto virtutum Domino in perpetuum famulari, nobis supplicavit humiliter et devote, ut providere sibi super hoc de apostolicae sedis clementia et benignitate apostolica dignaremur. Nos igitur, huiusmodi praefati Kanuti supplicationibus inclinati, universitati vestrae per apostolica rescripta districte mandamus, quatenus Kanutum et monasterium antedicta praemissorum occasione deinceps nullatenus perturbetis nec per alios perturbari quomodolibet procuretis, sed permittatis in pace praedictum Kanutum degere Deoque servire in monasterio et Cisterciensi ordine memoratis. Sic igitur huiusmodi mandatum apostolicum vobis directum obedienter adimplere curetis, quod exinde de virtute obedientiae humilis et devotae, ad quam etiam vos regularis observantiae vigor astringit, commendari merito valeatis. Datum Avinione, idus septembris, anno decimonono.

In e. m. eisdem quoad Laghonem Petri de Daldemp monachum mon. Rurisregii ord. Cist. dioec. Sleswicen., olim ordinis fratrum Min.