« bullarium-franciscanum-4305 »

Archiepiscopo Neapolitano.

Opus meritorium et virtutis exequimur, cum occurrimus periculis animarum et praebemus materiam, qualiter via praesertim inter personas religiosas scandalis praecludatur, sic quod eaedem personae favente illo, a quo bona cuncta procedunt, in honestatis ac pacis pulchritudine quiescentes liberis et quietis mentibus pensum exolvant Altissimo debitae servitutis. Sane petitio dilecti filii Geraldi ministri generalis ordinis fratrum Minorum nuper nobis exposita continebat, quod iuxta conventum sancti Laurentii de Neapoli fratrum dicti ordinis est quoddam monasterium monialium dictum sancti Gregorii ordinis sancti Benedicti sola carreria media inter conventum et monasterium praedicta, quod quidem monasterium habet unam domum seu cameram a parte dicti conventus ipsorum fratrum iuxta ipsorum dormitorium, ad quam ipsae moniales veniunt per pontem, qui est supra carreriam quasi portale. Quare dictus minister pro utriusque ordinis et conventus honestate nobis humiliter supplicavit, ut dictas moniales ad dimittendum ipsis fratribus domum illam et ad recipiendum recompensationem bonam in domibus melioribus a parte claustri et conventus earum [sitis] per aliquem discretum induci et etiam compelli facere dignaremur. Nos igitur attendentes petitionem huiusmodi rationi fore consonam et de radice procedere honestatis, fraternitati tuae per apostolica scripta mandamus, quatenus, si est ita, praefatas moniales auctoritate nostra efficaciter ad praemissa faciendum inducas et, si opus fuerit, compellere non postponas, contradictores per censuram apostolicam appellatione postposita compescendo: non obstante etc. Datum Avinione, VI idus decembris, anno decimo septimo.