« bullarium-franciscanum-4198 »

Ven. fratribus archiepiscopo ‥a eiusque suffraganeis et dilectis filiis inquisitoribus haer. prav. in eis partibus auctoritate apostolica deputatis.

Dudum ad audientiam apostolicae sedis multorum insinuatione perducto, quod nonnulli profanae multitudinis, qui vulgariter Fraticelli seu Fratres de paupere vita aut Bizochi sive Bighini vel aliis nominibus nuncupantur, in partibus Italiae necnon in insula Siciliae, comitatu Narbonensi et Tholosana civitatibus et dioecesibus ac provinciis aliisque cismarinis partibus contra sacros canones habitum novae religionis assumere, congregationes et conventicula facere et superiores sibi ipsis eligere, quos ministros seu custodes vel guardianos aut nominibus appellant aliis, plurimos ad eorum sectam recipere [in domibus], in quibus habitant in communi, publice mendicare, quasi eorum secta [esset] una de religionibus per sedem apostolicam approbatis, temeritate dampnabili praesumpserant et praesumebant etiam incessanter et, ut ipsorum [error] veritas et impietas religio putaretur, plurimi eorum regulam ordinis fratrum Minorum, quam s. Franciscus instituit, se profiteri et ad litteram observare fingebant, quamquam sub obedientia generalis vel provincialium ministrorum ipsius ordinis minime morarentur (praetendentes se a sanctae memoriae Coelestino papa V praedecessore nostro huiusmodi status seu vitae privilegium habuisse: quod tamen, etiam si ostenderent, non valeret, cum fel. rec. Bonifatius papa VIII praedecessor noster ex certis causis rationabilibus omnia privilegia ab ipso Coelestino concessa, quae per ipsum Bonifatium non contingeret approbari, vacuasset iuribus nec dictum privilegium inveniretur per eundem Bonifatium approbatum): nos attendentes, quod in errorum baratrum faciliter ruunt, qui conceptus proprios patrum diffinitionibus anteponunt, ipsorumque quam plurimi, sicut nobis fidedigna innotuerat relatio, a veritate catholicae fidei deviabant, contra sectam, ritum et statum huiusmodi auctoritate apostolica de fratrum nostrorum consilio processimus sub hac forma: « Ioannes etc. Ad perpetuam rei memoriam. Sancta Romana atque universalis ecclesia » etc. ut supra n. 297.

Sane quia sectam praefatam non resurgere sed abolitam remanere perpetuo praedictamque inviolabiliter observari sententiam plenis desideriis affectamus, ad quod expedire plurimum credimus processum et sententiam huiusmodi saepius praesente fidelium multitudine publicari: discretioni vestrae per apostolica scripta in virtute obedientiae districtius iniungendo mandamus, quatenus vos, archiepiscope et suffraganei, per vos vestrosque subditos et alios viros religiosos et saeculares, exemptos et non exemptos, de quibus vobis videbitur, quos ad haec non obstantibus ... compellere ... valeatis, singulis diebus dominicis et festivis in ecclesiis et locis vestrarum civitatis et diocesis ac in sermonibus publicis, de quibus expedire cognoveritis, eosdem processum et sententiam, dum clerus et populus ad divina vel sermones audiendos convenerint, publicantes, omnes et singulos sectam huiusmodi observantes generaliter necnon nominatim illos, de quibus vobis ... constiterit in praemissam incidisse sententiam, excommunicatos denuntiare singulis diebus dominicis et festivis in eisdem ecclesiis, locis et sermonibus publice procuretis. Et quia sine fautoribus et receptatoribus diu pestilentes homines huiusmodi latere non potuerunt nec durare, diebus dominicis et aliis solemnibus praesente fidelium multitudine copiosa sub excommunicationis poena et aliis, quae fautoribus et receptatoribus talium per iura canonica sunt inflictae, ut a fautoria et receptione ac defensione illorum publica et occulta debeant abstinere, moneatis et efficaciter inducatis, contra non parentes monitioni huiusmodi ad denuntiationem inflictarum et impositionem comminatarum poenarum huiusmodi et alias, prout expedire videritis, vos, archiepiscope et suffraganei, vestra ordinaria, vosque, filii inquisitores, auctoritate apostolica (simpliciter, de plano, absque strepitu et figura iudicii) iuxta statuta canonum et privilegia concessa inquisitionis officio procedentes: invocato ad hoc, si necesse fuerit, auxilio brachii saecularis. Datum Avinione, XIII kal. martii, anno quintodecimo.