« bullarium-franciscanum-4188 »

Dilectis filiis magistro Manueli de Flisco archidiacono de Nothincham in ecclesia Eboracensi, notario nostro, ac ‥ s. Simpliciani et ‥ s. Dyonisii Mediolanen. monasteriorum abbatibus.

Prudentum virginum votis, quae spreto mortalis viri thoro ei, qui speciosus est prae filiis hominum, desponsari desiderant, debemus et volumus favorabiles inveniri. Cum itaque dilecta in Christo filia Margarita nata dilecti filii Girardi de Vargiate de Mediolano domicelli, puella litterata Mediolanensis, cupiat, sicut accepimus, in monasterio monialium s. Apollinaris Mediolanen. ordinis s. Clarae una cum dilectis in Christo filiabus ‥ abbatissa et conventu eiusdem monasterii sub regulari habitu virtutum Domino famulari, nos, volentes ipsam in huiusmodi laudabili proposito confovere, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios ipsam Margaritam, si sit idonea et aliud canonicum non obsistat, auctoritate nostra in dicto monasterio recipi faciatis in monacham et sororem sibique iuxta ipsius monasterii consuetudinem regularem habitum exhiberi ac ei de communibus eiusdem monasterii proventibus sicut uni ex aliis dicti monasterii monialibus integre provideri ipsamque sincera ibidem in Domino caritate tractari: non obstantibus etc., contradictores etc. Datum Avinione, VII kalendas decembris, anno quintodecimo.