« bullarium-franciscanum-4186 »

Iohannae reginae Franciae.

Litteras regias super sententia lata per venerabilem fratrem nostrum Parisien. episcopum et dilectum filium ‥ inquisitorem haereticae pravitatis illarum partium contra Corradum ordinis fratrum Minorum accepimus et in eis contenta intelleximus diligenter. Profecto, filia carissima, si excellentiae regiae fuisset negotii exposita veritas, nec dicti fratris facinus reputares modicum nec gravem praefatam sententiam iudicares. Considera, filia carissima, si tibi frater ille falso crimen imposuisset haeresis et in hoc pertinaciter diebus pluribus perduraret; si tandem inductus a suis fratribus et aliis viris prudentibus veritatem agnoscens recognosceret se errasse etiamque falso crimen imposuisse praedictum: si crimen istud leve aut modicum, et si per iudicem extitisset condempnatus ad carcerem, si gravem sententiam huiusmodi reputares? Sine dubio credimus, quod nec crimen leve sed grave, nec gravem sed multum levem sententiam huiusmodi ex[is]timares; quare multo minus praedictum facinus, quod ipsum fratrem convincebat haereticum, non leve sed grave iudicari debet merito, cum inter gravissima numeretur, nec gravis sententia immo mitis admodum est censenda. Nec, quod de antipapa proponitur, iuvat istum. Antipapa quidem non coactus sed liber errorem suum recognovit et per suas litteras a nobis humiliter veniam postulavit, offerens se paratum per loca omnia, de quibus nobis videretur expediens, confiteri sua scelera, et quae contra nos fecerat vel dixerat, revocare. Iste autem e contra spontaneus se nostris constitutionibus opposuit, asserens catholica, quae dictae constitutiones iudicabant haeretica, et econtra; et captus propterea in haeresi huiusmodi multo tempore pertinaciter perduravit. Sane, filia dilectissima, quia (illius, cuius in terris licet indigni vices gerimus, quantum ipse nobis clementer tribuit, imitantes exemplum) mortem ipsius Corradi nolumus, sed ut vere convertatur et vivat: ecce quod pro Dei honore regiaeque interventionis obtentu dictis episcopo et inquisitori per nostras damus litteras in mandatis, ut dictum Corradum, si signa vera in eo poenitentiae percipiant, a carcere liberent suoque ordini illum restituant, eidem imposita poenitentia, de qua ipsis visum fuerit expedire. Datum [Avinione,] VIII kalendas decembris, anno quintodecimo.