Description
-
Jean XXII (1316-1334)
-
Cantori Parisiensi scribit de comburendis per episcopum et theologos Parisienses certis quibusdam litteris, de processibus contra Ioannem de Ianduno et Marsilium de Padua necnon Ludovicum Bavarum et Petrum de Corvaria habitis, de litteris praesentandis definitoribus aliisque fratribus Min. in capitulo generalis Parisiis congregatis.1
-
1329, maii 30, Avinione.
-
1329
-
Geraldo de Campimulo cantori Parisiensi.
Tam venerabilis fratris nostri Hugonis episcopi et dilectorum filiorum ‥ capituli Parisiensis quam tuis benigne receptis litteris earumque tenoribus diligentius intellectis, praefatis episcopo et capitulo iuxta formam, quam cedula continet praesentibus interclusa, scribimus ac tuam quam adhibuisti super praedictis diligentiam plurimum in Domino commendamus, tuam prudentiam exhortantes, quatinus, ut processus, qui per eosdem episcopum et capitulum contra culpabiles et suspectos de illarum appellatione litterarum, sicut ipsorum ac tuae continebant litterae, sunt incepti, usque ad finem et effectum procedant debitos, studiosam adhibere sollicitudinem non postponas. Rursus deliberationem de comburendo Parisius publice litteras illas per eosdem episcopum et capitulum ac doctores sacrae scripturae habitam approbantes, volumus, quod originales litterae (transsumptis retentis sub manu publica et sigillis eiusdem Parisiensis et alicuius alterius episcopi communitis), cum nos similes litteras et sub eisdem sigillis penes nos habeamus, ante Parisiensem ecclesiam in platea publice (publicatis tamen prius tribus processibus, quos tibi mittimus) comburantur, ad quae procedi modo qui sequitur volumus. Primo quidem processus contra illos pessimos haereticos Iohannem de Ienduno et Marcilium de Padua dudum factus (non obstante, si forsan alias publicatus extiterit, ut de ipso recensior memoria habeatur), secundo processus adversus Ludovicum de Bavaria, et subsequenter alius contra Petrum de Corvaria noviter habitia solemniter, immediate unus post alium, publicentur. Qua publicatione praemissa praedictarum litterarum immediate combustio subsequatur. Super quibus omnibus necnon, ut litterae clausae directae praefato episcopo et universitati Parisiensis studii nobis destinentur e vestigio, adhibere diligentiam sedulam non omittas. Praeterea cum dilectis filiis diffinitoribus capituli generalis ordinis fratrum Minorum et fratribus in eodem capitulo Parisius congregatis clausas nostras per te sibi praesentandas litteras dirigamus,b volumus, ut habita deliberatione cum fratribus, de quibus tibi videbitur, super modo praesentationis huiusmodi praesentes easdem, rescripturus nobis singulariter et certitudinaliter, quae circa praemissa omnia ordinata fuerint quomodolibet sive gesta. Processum autem contra perfidum Michaelem olim dicti ordinis Minorum ministrum tibi breviter intendimus dante Domino destinare. Dat. Avinione, III kal. iunii, anno tertiodecimo.c
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°797., p.398
-
Reg. Vat. t. 115, f. 153, ep. 744; cfr. Chart. Univers. Paris. t. II, p. 326, n. 891. Litterae quaedam apertae Ludovici Bav., Nicolai antipapae (Petri de Corvaria), Michaelis de Caesena olim min. gen. ord. Min. erant Parisios directae et clam de nocte in valvis cathedralis, fratrum Minorum, fratrum Praedicatorum ecclesiarum affixae, « in quibus multae blasphemiae de domino papa Ioanne falso inserebantur ». Sed clausae quoque litterae ab eisdem viris episcopo Parisien. et universitati studii Paris, missae sunt, quae, cum essent suspectae, summo pontifici transmissae sunt. Ad ipsum autem similes litterae iam directae erant. Combustio illarum litterarum per episcopum Parisien. solemniter fiebat die festo Pentec. (11 iunii) 1329. Post ipsarum concremationem Henricus de Semons, mag. theol. et min. prov. Franciae ord. Min., surrexisse et ex parte capituli generalis Parisiis illis diebus celebrati processus papae, de quibus in bulla supra relata sermo est, approbasse dicitur.
1 -
(a) In coena Domini (die 20 apr.) 1329; cfr. supra n. 786.
-
(b) Cfr. supra n. 791 [795].
-
(c) Die 13 iulii 1329 summus pontifex scribit Hugoni episcopo Parisiensi et universitati magistrorum et scolarium studii Parisiensis: « Litteras quasdam clausas vobis directas ianuis Parisiensis affixas ecclesiae hiis diebus, quas nobis nuncius vester una cum litteris vestris aliis, clausis similiter, praesentavit, benigne recepimus, devotionem et fidelitatem, quas ad nos et sanctam Romanam ecclesiam vos in praemissis ostendistis gerere, plurimum in Domino commendantes, scientes, quod praefatae litterae vobis directae erant cuiusdam fratris Minoris fatui, qui se vocat Gerardum Rostagni de Ianua, prophani illius Michaelis de Caesena haeretici et scismatici sequacis et fautoris, quique [dicto Michaeli] in fuga, quam fecit de loco curiae nostrae, affuit (sicut ipse fatetur in eisdem litteris) auxiliis et consiliis oportunis ». Cfr. Chart. Univ. Paris. t. II, pag. 330, n. 895.