« bullarium-franciscanum-4083 »

Archiepiscopis et episcopis per regnum Angliae constitutis.

Sicut vestram credimus prudentiam non latere, nos dudum, postquam Michael de Caesena olim ordinis Minorum generalis minister ..... et duo nequam complices sui, videlicet Bonagratia de dicto ordine .... et quidam Anglicus vocatus Guilelmus Okam ordinis praelibati, contra quem ratione multarum opinionum erronearum et haereticalium, quas ipse scripserat et dogmatizaverat, pendebat inquisitio auctoritate nostra, iam erat diu, in eadem curia inchoata ...., latente et furtive nocturno tempore .... se ad fugae ignominiam converterunt, ad Ludovicum de Bavaria et Petrum de Corbaria haereticos et scismaticos manifestos eorumque complices et sequaces aliosque rebelles Dei et eiusdem ecclesiae dirigendo infelices propere gressus suos: nos contra ipsos, qui ab huiusmodi revocari devio quamvis moniti super hoc noluerunt, exigente iustitia procedentes, ipsos Michaelem, Bonagratiam et Guilelmum, deliberatione cum fratribus nostris praehabita et de ipsorum consilio reputavimus merito contumaces ipsosque ratione contumaciae huiusmodi duximus excommunicationis vinculo innodandos, ..... sicut in processibus nostris super hiis solemniter habitis plenius continetur. Cum autem dictus Guilelmus (qui post fugam praedictam cum eisdem scismaticis, haereticis et rebellibus, eis adhaerendo et favendo ipsorumque haereses et errores una cum aliis suis complicibus dampnabiliter fulciendo, extitit continue, sicut habet fama seu potius infamia publica, conversatus multaque scripta erronea et haereticalia contra constitutiones et declarationes sedis apostolicae, cum magna et matura deliberatione fratrum praedictorum ac praelatorum et aliorum multorum tam sacrae scripturae quam iuris utriusque peritorum, in eadem curia tunc praesentium, editas et factas, quam alias etiam adversus veritatem catholicam edidisse ac dogmatizasse noscitur, per quae se reddidit de haeresis et scismatis criminibus patenter et manifeste convictum) ad partes regni Angliae una cum quibusdam suis aliis in hac parte complicibus se conferre dicatur: nos periculis, quae fidelibus earum partium ex dicti Guilelmi haeretici et scismatici conversatione ipsiusque dogmatizationibus et inductionibus venenosis possent contingere, cupientes salubriter obviari, fraternitati vestrae per apostolica scripta in virtute sanctae obedientiae districtius iniungendo mandamus, quatinus praefatum Guilelmum velut de criminibus supradictis convictum et alios quoslibet suos in hac parte complices, sequaces et fautores vel dogmatizatores contra constitutiones et declarationes praedictas, tanquam de ipsis criminibus vehementer suspectos, ubicunque reperti fuerint, capiatis ipsosque carcerali mancipetis custodiae ac de ipsis exhibere curetis iuxta sanctiones canonicas iustitiae complementum, invocato ad hoc, si opus fuerit, auxilio brachii saecularis, non obstantibus quibuscumque privilegiis etc.: vos super praedictis et ea tangentibus sic solerter et fideliter tanquam defensores et zelatores fidei catholicae fervidi habituri, quod praeter mercedis aeternae praemium, quod inde merebimini, nostram et eiusdem sedis gratiam vobis uberius acquiratis. Datum Avinione, nonis aprilis, anno tertiodecimo.

I. e. m. episcopo Lincolniensi, verbis competenter aptatis.a