« bullarium-franciscanum-4004 »

Dilectis filiis ‥ priori sancti Orienti et ‥ de Baldiaco Auxitan. ac Bernardo de Abrossano Pampilonen. archidiaconis ecclesiarum.

Significavit nobis dilectus filius nobilis vir Bernardus comes Astariaci, quod locus ordinis fratrum Minorum, quem quondam Martha eiusdem comitis uxor olim, dum viveret, de salute propria invigilans, in fundo proprio in castro Mirandae Auxitan. dioecesis fundavit, adeo arctus existit, quod fratres eiusdem ordinis habitantes in eo non habent sufficientem aream seu spatium pro horto et ad aedificandum in loco ipso eis necessarias officinas, quinimo per dilectum filium priorem prioratus dicti castri Cistercien. ordinis et nonnullos alios impediuntur multipliciter, quo minus fratres ipsi acquirant et valeant obtinere ampliationem et dilatationem eiusdem loci eis necessariam ad praemissa. Quare dictus comes pro parte ipsorum fratrum nobis humiliter supplicavit, ut circa huiusmodi ampliationem dicti loci providere eis paterna diligentia dignaremur. Nos itaque de praemissis notitiam non habentes, discretioni vestrae per apostolica scripta committimus et mandamus, quatenus vocatis dictis priore et aliis, qui fuerint evocandi, nisi prior seu alii praelibati aliquam iustam causam allegaverint atque de ea docuerint coram vobis, quare fratres ipsi emere vel recipere seu acquirere locum seu loca, per quae ampliare dictum locum eorum possint, non debeant, vos saepefatis fratribus acquirendi, emendi et obtinendi licite ad ampliationem et dilatationem huiusmodi locum seu loca, quae eis ad hoc sufficiant, quibuscunque constitutionibus contrariis nequaquam obstantibus, plenam et liberam facultatem auctoritate apostolica concedatis, contradictores per censuram ecclesiasticam appellatione postposita compescendo, non obstantibus etc. Datum Avinione, VIII kalendas iunii, anno duodecimo.