« bullarium-franciscanum-3910 »

a) Dilecto filio Raymundo Morini ordinis fratrum Minorum.

Super cunctos fideles etc. Pro parte siquidem tua humili nobis extitit insinuatione monstratum, quod tu olim post professionem a te in ordine tuo factam, antiqui hostis astutia seducente raptus et ductus animi levitate, huiusmodi ordine derelicto, habitu dictae professionis abiecto, reversus ad saeculum extitisti et in eo ac per illud fuisti per multa tempora, prout es, vagabundus; sed mentem tuam illustrante Domino, ne perires, corde iam contritus et humiliatus in spiritu, alicuius sacrae religionis ad caulam reduci desideras et in ea ulterius reddere Altissimo vota tua, credens ad captandum tibi salutis profectum et impetrandam divinae miserationis gratiam in ordine alio cum aequiori tuae mentis quiete virtutum Domino solvere pensum debitae servitutis. Quare fuit ex parte tua nobis humiliter supplicatum, ut te ab excommunicationis sententia, quam propter apostasiam huiusmodi nosceris incurrisse, iuxta ecclesiae formam absolvere tibique ad eumdem alium ordinem transeundi licentiam indulgere de miseranda sedis apostolicae clementia dignaremur. Nos itaque votis tuis in hac parte paternae provisionis remedio occurrere intendentes, tuis supplicationibus inclinati, te a dicta sententia misericorditer absolventes, tibi, ut ad alium ordinem Mendicantium dumtaxat per sedem approbatum eamdem transire ac in eo, postquam ad ipsum transieris, sedulum Deo famulatum impendere valeas (non obstantibus quibusdam constitutionibus canonicis ac statutis, consuetudinibus etc.), auctoritate praesentium licentiam concedimus de gratia speciali. Nulli ergo etc. Datum Avinione, idibus iunii, anno decimo.

b) In e. m. dilecto filio Guillelmo Castellani de Castronovo ordinis fratrum Min.