« bullarium-franciscanum-3696 »

Dilectis in Christo filiabus ‥ abbatissae et conventui monasterii sororum Minorissarum sancti Francisci de Bononia ordinis sanctae Clarae seu sancti Damiani.

Exhibita nobis vestra petitio continebat, quod nos olim (pium et congruum reputantes, ut universas abbatissas et conventus monialium monasteriorum ordinis sanctae Clarae, sive sancti Damiani sive Minorissae dicerentur, illa prosequeremur gratia, quam conspiceremus earum necessitatibus opportunam) eis et singulis earum ad instar fel. rec. Bonifatii VIII praedecessoris nostri per nostras sub certa forma litteras duximus indulgendum, ut ad praestationem decimarum de quibuscunque possessionibus et aliis omnibus bonis, quae tunc habebant et iustis modis praestante Domino acquirerent in futurum, vel ad contribuendum in procurationibus quorundam ordinariorum et etiam legatorum et nuntiorum sedis apostolicae et quibuslibet talliis et collectis ac exhibendum paedagia, telonea et alias exactiones quibusvis regibus, principibus seu aliis personis saecularibus minime tenerentur nec ad id aliquatenus compelli valerent. Cum autem, sicut asseritis, tam occasione decimae, quae colligebatur de mandato fel. rec. Clementis papae V praedecessoris nostri et de mandato nostro in partibus illis ad praesens colligitur, quam etiam collectarum legatorum seu nuntiorum sedis apostolicae, quae in partibus illis exiguntur, per vos non solutarum nonnulli processus contra vos et monasterium vestrum tam per collectores ipsius decimae auctoritate nostra deputatos quam per eosdem legatos et nuntios habiti fore dicantur, nobis humiliter supplicastis, ut providere vobis in hac parte paterna diligentia dignaremur. Nos igitur, volentes, ut in quiete animi possitis virtutum Domino gratum impendere famulatum, vobis, ut ad solutionem tam huiusmodi decimae impositae seu in futurum auctoritate apostolica imponendae quam etiam collectarum legatorum et nuntiorum ipsius sedis impositarum et imposterum imponendarum minime teneamini, nisi expresse de vobis et ordine vestro in nostris litteris facta fuerit mentio specialis, auctoritate praesentium indulgemus ac quaslibet excommunicationis et interdicti sententias in vos et monasterium vestrum contra huiusmodi indulti nostri tenorem et processus contra vos ac monasterium vestrum habitos et habendos omnino carere viribus et nullius fore decernimus firmitatis. Nulli ergo etc. Datum Avinione, kalendis septembris, anno quarto.