« bullarium-franciscanum-3686 »

Venerabili fratri Ioanni episcopo Tyburtin.

Onerosa pastoralis officii etc. Nuper siquidem ecclesia Tyburtinaa ecclesiae Romanae immediate subiecta per obitum bonae memoriae Iacobib episcopi Tyburtini, qui in partibus illis diem clausit extremum, pastoris solatio destituta, nos ad eamdem ecclesiam, utpote in brachiis sedis apostolicae constitutam, specialis dilectionis dirigentes affectum et cupientes, ut ipsi ecclesiae praeficeretur persona secundum cor nostrum idonea, per cuius industriam status eius posset salubriter dirigi et utiliter gubernari, provisionem eiusdem ecclesiae nostrae ac dictae sedis dispositioni ea vice duximus reservandam, decernentes ex tunc irritum et inane, si secus super hoc per quoscumque scienter vel ignoranter contingeret attentari. Verum volentes eidem ecclesiae, ne diutinae vacationis subiaceret incommodis, de celeris et salubris provisionis remedio subvenire, post deliberationem, quam super hoc cum fratribus nostris habuimus diligentem, consideratis muneribus gratiarum, quibus personam tuam illarum Dominus insignivit, ad te ordinem fratrum Minorum expresse professum, in sacerdotio constitutum, virum utique litterarum scientia praeditum, morum honestate decorum, aliisque virtutum donis multipliciter insignitum, direximus oculos nostrae mentis. Quibus omnibus debita meditatione pensatis, de persona tua nobis et eisdem fratribus ob tuorum exigentiam meritorum accepta, de ipsorum fratrum consilio eidem ecclesiae Tyburtin. duximus providendum, teque illi praeficimus in episcopum et pastorem, tibi curam et administrationem ipsius in spiritualibus et temporalibus plenarie committendo, tibique subsequenter fecimus per venerabilem fratrem nostrum Berengarium episcopum Portuen. munus consecrationis impendi etc. Datum Avinione, III nonas maii, anno quarto.