« bullarium-franciscanum-3678 »

Venerabili fratri ‥ archiepiscopo Beneventan.

Inter sollicitudines alias etc. Sane dudum, cupientes de provisione Arianen. ecclesiae per apostolicae sedis providentiam ordinare, provisionem ipsius ea vice, cum eam vacare contingeret, dispositioni nostrae et sedis eiusdem duximus reservandam, decernentes etc. Postmodum eadem ecclesia per obitum b. m. Rostagni episcopi Arianen. pastoris regimine destituta dilecti filii capitulum eiusdem ecclesiae, huiusmodi forsan nostrae reservationis ignari, consideratis muneribus gratiarum, quibus Dominus personam dilecti filii Laurentii ordinis fratrum Minorum, electi Arianen., multipliciter insignivit, ipsum Laurentium in eorum episcopum concorditer elegerunt. Nos vero de statu ipsius ecclesiae, ne diutinae vacationis experiatur incommoda, cogitantes et diligentius attendentes multiplicia dona virtutum, quibus carissimus in Christo filius noster Robertus rex Siciliae illustris personam dicti electi asserit insignitam, quodque in dicto electo vota dictorum capituli sic concorditer concurrerunt eum in eorum episcopum unanimiter eligendo, praemissis debita meditatione pensatis, volumus de apostolicae plenitudine potestatis, quod huiusmodi electioni factae de ipso electo praefata reservatio non obsistat, quodque nihilominus tu ad confirmationem electionis ipsius, si quidem alias eam inveneris de persona idonea canonice celebratam nullumque in hac parte sibi canonicum obviare, libere procedere valeas, ac si nulla reservatio processisset, in contrarium editis non obstantibus constitutionibus quibuscumque. Datum Avinione, kalendis martii, anno quarto.