Description
-
Clément V (1305-1314)
-
Stephanum (ex ord. Min.) episcopum Portugallen. ad Ulyssiponen. ecclesiam transfert.1
-
1313, octobris 8, Grauselli.
-
1313
-
Venerabili fratri Stephano episcopo Ulixbonen.a
Ecclesiarum utilitati etc. Nuper siquidem Ulixbonen. ecclesia (per translationem venerabilis fratris nostri Ioannis, olim Ulixbonen. episcopi, in archiepiscopum Bracharen. electi, per nos factam de ipso Ioanne ad Bracharen. ecclesiam tunc pastore carentem) solatio destituta pastoris, nos attendentes, quod de ipsius Ulixbonen. ecclesiae ordinatione nullus praeter nos se intromittere poterat (pro eo, quod nos dudum ante vacationem huiusmodi provisiones omnium ecclesiarum cathedralium tunc apud apostolicam sedem vacantium et vacaturarum in posterum dispositioni nostrae et eiusdem sedis reservavimus, decernentes ex tunc irritum et inane, si secus super iis a quoquam quavis auctoritate scienter vel ignoranter contingeret attentari), ac de provisione ipsius Ulixbonen. ecclesiae, ne prolixae vacationis exponeretur incommodis, sollicite cogitantes, tamdem post deliberationem, quam ad deputandum eidem Ulixbonen. ecclesiae personam utilem ac etiam fructuosam cum nostris fratribus habuimus diligentem, ad te tunc Portugallen. episcopum, virum utique litterarum scientia praeditum, morum honestate conspicuum, consilio providum, ac in spiritualibus et temporalibus circumspectum, nostrae considerationis intuitum duximus dirigendum. Quapropter de praedictorum fratrum consilio et apostolicae plenitudine potestatis te a vinculo, quo tenebaris Portugallen. ecclesiae, absolventes te ad Ulixbonen. ecclesiam supradictam transferimus teque ipsi Ulixbonen. ecclesiae in episcopum praeficimus et pastorem, liberam tibi concedendo licentiam ad eamdem Ulixbonen. ecclesiam te transferendi tibique curam et administrationem ipsius in spiritualibus et temporalibus committendo etc. Datum in prioratu de Grausello Vasionen. dioecesis, VIII idus octobris, pontificatus nostri anno octavo.b
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°221., pp.-98
-
Reg. Vat. t. 60, f. 213, ep. 665 (n. 9718). Cfr. supra n. 152.
1 -
(a) Lisboa, quae civitas est caput regni Lusitaniae sive Portugalliae.
-
(b) Clemens V eidem Stephano, qui a. 1322 transfertur ad Conchen. eccl., die 27 oct. 1313 tribuit facultatem mutuum contrahendi usque ad summam 6000 fl. auri pro suis necessariis et ecclesiae suae negotiis expediendis; die vero 27 nov. 1313 ei, cum regem Portugalliae, cuius est consiliarius, sequi debeat et ab eo frequentius evocetur, indulget, quod ecclesias, monasteria et loca ecclesiastica suae dioec. per alium visitare atque duabus personis idoneis canonicatum et praebendam in sua ecclesia conferre valeat; die autem 18 dec. 1313 eum compelli iubet ad solvendum in terminis praefixis illa 6000 fl. auri, quae auctoritate apostolica pro suis et ecclesiae suae negotiis expediendis a Bencio Carucii cive et mercatore Florentin. mutuo acceperat (n. 9707, 10083, 10087, 10104).