« bullarium-franciscanum-3416 »

Dilecto filio ‥ ministro fratrum ordinis Minorum in provincia Burgundiae.

Apostolicae sedis consueta benignitas cunctorum iustas petitiones admittere consuevit, sed illorum praecipue, qui nobilitatis titulo insigniti se illius gratos affectibus per sincerae devotionis studia repraesentant. Cum itaque dilectus filius vir Ioannes de Cabilone dominus de Arlato quemdam locum cum oratorio domibus et officinis ad opus sororum ordinis sanctae Clarae in eadem villa sua de Arlato Bisuntinae dioecesis aedificare propriis sumptibus et expensis, et eisdem sororibus, quas videlicet contigerit in eodem domino famulari, pro suorum et parentum suorum remedio peccatorum de necessariis providere proponat: nos, ut illa aedificare et construere valeat sine iuris praeiudicio alieni, sibi per alias nostras litteras plenam duximus licentiam concedendam. Quocirca [tibi per apostolica scripta] mandamus, quatenus sorores antiquas, bonas et utiles, per quas novitiae et iuvenes sorores, quae in loco recipientur eodem, informari valeant regularibus disciplinis (et locus ipse salubrius gubernari), quas nobilis praedictus de provincia Burgundiae duxerit eligendas; nec non et dictis sororibus, quae sub cura fratrum tui ordinis vivere dignoscuntur et quas in eodem monasterio locari contigerit, fratres ipsius ordinis Minorum ad hoc idoneos, qui eas gubernent ipsisque ministrent ecclesiastica sacramenta, quos idem nobilis elegerit de provincia memorata, sine difficultate concedas, cum ab ipso fueris requisitus. Nos enim dictis sororibus sic electis, quod monasteria, in quibus morantur ad praesens, exire et ad dictum monasterium se transferre valeant (constitutione fel. record. Bonifatii papae VIII praedecessoris nostri, qua sancitur, universas et singulas moniales, cuiuscumque ordinis vel religionis existant, in quibuscumque mundi partibus existentes, sub perpetua in suis monasteriis debere permanere clausura: ita quod nulli earum religionem tacite vel expresse professae sit vel esse valeat quacumque ratione vel causa, nisi in certis casibus ibidem expressis, monasteria ipsa egrediendi facultas, nequaquam obstante), plenam et liberam concedimus auctoritate praesentium facultatem. Datum ut supra.