« bullarium-franciscanum-3395 »

Venerabili fratri Guillelmo de Villanova ordinis fratrum Minorum per nos assumpto in episcopum suffraganeum archiepiscopalis sedis Cambalien. in dominio Tartarorum.a

Considerantes olim clara sanctae operationis studia, quae dilectus filius frater Ioannes de Monte Corvino in archiepiscopum Cambalien. per nos assumptus in partibus Tartarorum secum Domini favente virtute operatus est hactenus ac in partibus ipsis existens assidue operatur, ipsum fratrem Ioannem ordinem fratrum Minorum professum ac in dictis partibus existentem de fratrum nostrorum consilio et apostolicae plenitudine potestatis in civitate Cambalien. (magna utique et honorabili regni magnifici principis Magni Chani regis Tartarorum) in archiepiscopum assumpsimus et praefecimus in pastorem, curam et sollicitudinem animarum omnium existentium in toto dominio Tartarorum sibi plenarie committentes; teque postmodum, sufficienter in lege Domini eruditum, de praedictorum fratrum nostrorum consilio et apostolicae potestatis plenitudine in adiutorium commune dicto fratri Ioanni et in partem sollicitudinis pro maiori animarum salute specialiter duximus deputandum ac in dicto dominio in episcopum assumpsimus et praefecimus in pastorem; ac demum tibi per venerabilem fratrem nostrum Petrum episcopum Sabinen. apud sedem apostolicam munus fecimus consecrationis impendi. Quocirca fraternitati tuae per apostolica scripta mandamus, quatenus ad partes praedictas sine dilatione qualibet cum gratia nostrae benedictionis accedens commissam tibi in hac parte curam et sollicitudinem sic salubriter gerere studeas, quod praeter divinae retributionis praemium dignis possis exinde laudibus merito commendari. Datum Pictavis, kalendis maii, pontificatus nostri anno tertio.