« bullarium-franciscanum-3387 »

Dilectis filiis ‥ guardiano, et conventui fratrum ord. Minorum de Mansoa Agennen. dioecesis.

Ex tenore vestrae petitionis accepimus, quod dudum inter vos ex parte una, ac Bernardum Coleti utriusque iuris professorem, dominum loci de Manso nec non et priorem, ac Raymundum Coleti fratrem eius canonicum ecclesiae et nonnullos laicos eiusdem loci de Manso Agennen. dioecesis super quibusdam iniuriis et excessibus contra vos et locum vestrum commissis per eos ex altera, materia gravis dissensionis exorta, tandem vos ad nostram praesentiam accedentes ac super iniuriis et excessibus huiusmodi contra priorem, canonicum et laicos memoratos petentes vobis per nos fieri iustitiae complementum eosque corrigi et super his indemnitati et securitati vestrae de opportuno remedio provideri: nos dilecto filio Ioanni Stephanelli cantori sancti Hilarii Pictaven. et Hugoni Geraldi canonico Lemovicen. ecclesiarum, capellanis nostris, commisimus causam huiusmodi alte et basse omni iuris solemnitate sublata, de plano sine strepitu et figura iudicii, partium ipsarum ad id accedente consensu, iudicio vel concordia terminandam. Dicti vero cantor et canonicus in praemissis procedere amicabiliter eligentes, inquisita super eisdem excessibus diligentius veritate habitoque super ipsis plurium consilio peritorum, pronunciaverunt et ordinaverunt inter alia, quod dictus prior pro expensis, damnis et interesse, quas et quae vos in prosecutione causae huiusmodi subiistis, trecentas libras monetae Arnalden.b tunc in dicto loco de Manso currentium hoc modo, videlicet centum infra nativitatem Domini tunc proxime venturam ac centum infra aliam eiusdem nativitatem immediate sequentem et reliquas centum libras dictae monetae infra tertiam praedictae nativitatis festivitatem secuturam immediate, vobis apud dictum locum Mansi solvere procuraret; quodque memoratus prior vobis decem libras praedictae monetae in dicto loco de Manso perpetuo singulis annis solvere teneretur, donec vobis tantumdem in redditibus duceret assignandum: pronunciantes dictum priorem eiusque bona esse vobis propter hoc specialiter obligata; de quibus decem libris idem prior in festo beati Francisci quatuor libras, ac in translatione ipsius sexaginta, et in sancti Antonii de ordine ipso festivitatibus reliquos sexaginta solidos eiusdem monetae persolvat ac solutionem eamdem vobis faciendam in festo translationis eiusdem proxime tunc sequenti incipere teneatur. Quam quidem pronunciationem et ordinationem vos et dictus prior expresse ratificastis et etiam approbastis, promittentes illam ordinationem observare inviolabiliter, prout in instrumento publico inde confecto, eorumdem cantoris et canonici sigillis munito, plenius dicitur contineri. Verum cum, sicut asseritis, memoratus prior in Turonen. duplicibus, computato quolibet Turonen. pro duobus et uno obulo Arnalden., dictas trecentas libras vobis solvere et exhibere proponat, vos considerantes, quod essetis per solutionem huiusmodi in magna parte praedictae pecuniae defraudati, nobis humiliter supplicastis, ut indemnitatibus vestris providere super hoc de benignitate apostolica dignaremur. Nos igitur vestris supplicationibus inclinati, quod dictae trecentae librae de moneta, quae tempore dictae condemnationis in dicto loco de Manso currebat, ac decem librae praefatae vobis ex nunc debitae per dictum priorem de moneta, quae pro eodem tempore condemnationis ipsius currebat, nunc autem de moneta, quae currit ad praesens, pro tempore praesenti solvantur et in futurum de pecunia, quam currere contigerit, persolvantur, auctoritate apostolica declaramus. Nulli ergo etc. Datum Pictavis, nonis februarii, pontificatus nostri anno tertio.

In e. m. venerabilibus fratribus archiepiscopo Burdegalen. et Agennen. ac Caturcen. episcopis.c