« bullarium-franciscanum-3303 »

Venerabili fratri episcopo Asten.a et dilectis filiis praeposito de Cheriob Taurinen. dioecesis et primicerio Taurinen.

Iniunctae nobis debitum servitutis exposcit, ut de personis ecclesiasticis, religiosis praecipue, sollicite cogitantes providere curemus necessitatibus eorum, ut eo devotius quo liberius valeant suum Domino studere famulatum. Cum itaque abbatissa et conventus monasterii sancti Francisci Taurinen.c ordinis sanctae Clarae, sicut ex parte ipsarum venerabilis frater noster P[apinianus] episcopus Parmen., sanctae Romanae ecclesiae vicecancellarius, exposuit coram nobis, adeo tenues habeant facultates, quod ex eis nequeant commode sustentari: nos eisdem ‥ abbatissae et conventui paterno in hac parte compatientes affectu ac volentes eis propter hoc et obtentu dicti episcopi, qui pro ipsis nostram gratiam suppliciter imploravit, de alicuius subventionis remedio providere, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios ecclesiam ruralem sancti Benedicti sitam prope Taurinum monasterio praedicto vicinam, dummodo ad id dilectorum filiorum praepositi et capituli ecclesiae sancti Bernardi de monte Iovisd ordinis sancti Augustini Augusten.e dioecesis, qui eam ad se asserunt pertinere, accedat assensus, cum iuribus et pertinentiis suis in usus proprios concedere et assignare curetis, ita quod cedente vel decedente rectore, qui nunc est, ipsius ecclesiae ruralis, vel alio quovis modo ea vacante, possint eadem abbatissa et conventus ruralis ecclesiae iurium et pertinentiarum praedictarum possessionem apprehendere et in usus retinere praedictos pro earum necessitatibus relevandis, cuiusquam assensu minime requisito et nihil iuris in ea venerabili fratri nostro episcopo et episcopatui Taurinen. seu dictis praeposito et capitulo vel cuique alii reservato, facientes eas pacifica illorum possessione gaudere. Non obstante etc. Datum Laterani, X kalendas martii, pontificatus nostri anno primo.