« bullarium-franciscanum-3295 »

Dilectis in Christo filiabus Ioannae abbatissae et conventui monasterii sancti Silvestri in capite de Urbea ordinis Minorum sororum inclusarum.

Dudumb fel. record. Bonifatius papa VIII praedecessor noster auctoritate apostolica statuit,c ut in monasterio vestro, in quo ordo sororum Minorum inclusarum servatur et tunc etiam salubriter servabatur, ex tunc ordo seu regula sanctae Clarae a piae memoriae Urbano papa IV praedecessore nostro editad servaretur, et quod abbatissa, sorores et conversi, quos et quas post statutum huiusmodi in ipso monasterio contingeret profiteri, profiterentur regulam supradictam ac secundum eam perpetuo vivere tenerentur, quodque praelibatum monasterium esset et diceretur dicti ordinis sanctae Clarae; praecipiens nihilominus, quod personae illae tunc in monasterio ipso degentes et in eo dictum ordinem sororum Minorum inclusarume professae, quae profiteri nollent regulam praelibatam, deberent in aliis monasteriis ipsius ordinis, quem professae fuerant, collocari. Decrevit quoque idem praedecessor, ut dilectus filius noster Matthaeusf sanctae Mariae in porticu diaconus cardinalis, qui est et tunc erat gubernator, ac ceteri Romanae ecclesiae cardinales, qui essent pro tempore gubernatores, protectores et correctores aliorum monasteriorum eiusdem ordinis sanctae Clarae ac ordinis fratrum Minorum, essent de cetero gubernatores, protectores et correctores praelibati monasterii vestri, personarum atque bonorum ipsius, et in praefato monasterio, personis et bonis eius potestatem haberent, sicut in aliis monasteriis praefati ordinis sanctae Clarae. Denuo autem huiusmodi statuti praetextu tam per cardinalem praefatum quam etiam per dilectum filium Petrum Garlengi canonicum basilicae principis apostolorum de Urbe ex commissione ab eodem cardinali super hoc sibi facta, vobis requisitis et monitis, quod infra certum terminum per illos praefixum vel profiteremini regulam praedictae sanctae aut illam profiteri nolentes clausuram praefati monasterii exirent, ut iuxta tenorem dicti statuti possent in aliis monasteriis vestri ordinis collocari: quia requisitionibus et monitionibus huiusmodi minime paruistis, fuerunt per eosdem cardinalem et canonicum in personas vestras excommunicationis ac in dictum vestrum monasterium interdicti sententiae promulgatae. Quare nobis humiliter supplicastis, ut, cum ex statuto praedicto, quod sine aliqua causa rationabili editum fuisse asseritis, et processibus ac sententiis praelibatis inde secutis gravium turbationum et dolorum sitis aculeo sauciatae ac circa regularem observantiam, quae in monasterio ipso vigere solebat, nimium in derogationem cultus divini nominis impeditae, ac nonnulla bona dicti monasterii occasione praefati statuti occupata existant et damna plurima vobis et eidem monasterio irrogata, et alias vos et monasterium ipsum sustinueritis in spiritualibus et temporalibus non modica detrimenta, providere in hac parte vobis et dicto monasterio de benignitate apostolica dignaremur. Nos igitur praemissis et aliis, quae circa ea consideranda erant, diligenter pensatis, intendentes vobis de illius providentiae remedio subvenire, per quod vos et monasterium ipsum a praedictis gravaminibus et dispendiis relevari, ad salubrem et tranquillum statum reduci et in eo utiliter conservari possitis — vobis primitus per dilectum filium nostrum Gentilemg tituli sancti Martini in montibus presbyterum cardinalem de mandato nostro beneficio absolutionis a vinculo excommunicationis iuxta ecclesiae formam impenso ac interdicti huiusmodi sententia relaxata — praedictum statutum ac omnes processus et sententias, et quaecumque alia contra vos vel praedictum monasterium secuta sunt ex ipso statuto vel ob id, auctoritate apostolica revocamus, cassamus et irritamus et omnino carere viribus nuntiantes vosque ad observationem ipsorum aliquatenus non teneri. Volumus quoque, ut bonorum temporalium monasterii vestri, quae occasione dicti statuti vel alias de mandato eiusdem praedecessoris Bonifatii adempta fuerant, necnon fructuum et reddituum medio tempore perceptorum ex eis vobis restitutio plena fiat. Nulli ergo etc. Datum Laterani, X kalendas ianuarii,h pontificatus nostri anno primo.

In e. m. (mutatis mutandis) venerabili fratri Iohannii episcopo Portuen.

Dudum etc. usque restitutio plena fiat. Quocirca fraternitati tuae praesentium auctoritate committimus et mandamus, quatinus huiusmodi bona temporalia dicti monasterii praefatis abbatissae et conventui, quae occasione dicti statuti vel alias de mandato eiusdem praedecessoris B[onifatii] eis adempta fuerant, nec non fructus et redditus medio tempore perceptos ex eis dictis abbatissae et conventui ac eidem monasterio plene restitui faciens, de fructibus, redditibus et proventibus dicti monasterii, qui a praefatis officialibus seu aliis percipi potuerunt, nec non et de pretio eorumdem ac de expensis factis pro recollectione et conservatione ipsorum fructuum et salario officialium, ab eisdem officialibus seu quibusvis aliis per te vel alium seu alios exactam exigas rationem, et quicquid supererit, dictis abbatissae et conventui facias assignari in utilitatem dicti monasterii convertendum, quitatione et reservatione facta per dictas abbatissam et conventum de hiis, quae ab eis de mandato tuo recipi contigerit de praedictis: contradictores etc. Dat. Laterani, X kalendas ianuarii, anno primo.j