« bullarium-franciscanum-3218 »

BONIFACIUS &c.

Dilecto filio Guillelmo de Cunaa electo Cassanen.b Salutem, & Apost. Ben.

Ad universalis &c.c Sane Venerabili Fratri nostro Richardo Episcopo Tricaricen.d de Ecclesia Cassanen. cui tunc præerat, & a cujus vinculo eum absolvimus, ad Ecclesiam Tricaricen. Apostolica auctoritate translato; Nos ad provisionem ipsius Ecclesiæ Cassanen. salutarem debitis vigiliis consurgentes, & cupientes de tali providere Pastore, qui eam gubernet utiliter, præservet a noxiis, eamque votiva lætitia consoletur, in te Ordinis Minorum professorem, virum utique litterarum scientia præditum, morum etiam gravitate decorum, Religionis zelatorem, in spiritualibus providum, & temporalibus circumspectum direximus oculos nostræ mentis; Quibus omnibus diligenti consideratione pensatis, de persona tua eidem Ecclesiæ Cassanen. providemus, præficientes te eidem Cassanen. Ecclesiæ de Fratrum nostrorum consilio, & Apostolicæ plenitudine potestatis in Episcopum, & Pastorem, tibi curam, & administrationem ipsius in spiritualibus, & temporalibus committendo, in illo, qui dat gratias, & largitur præmia, confidentes, quòd Ecclesia ipsa Cassanen. sub tuo felici regimine prospere dirigetur, ac salubria, dante Domino, suscipiet incrementa. Reverenter itaque suscipe jugum Domini, & suavi ejus oneri humiliter colla submitte, ipsius Ecclesiæ Cassanen. sollicitam curam gerendo, gregem Dominicum in ea tibi commissum doctrinâ verbi, & operis informando, ita quòd apud Pastorem Cælestem felicitatis æternæ præmium, & apud Nos, qui personam tuam affectione paterna prosequimur, exinde favorem, & gratiam uberiùs consequi merearis. Datum Laterani II. Kalendas Martii, Pontificatus nostri Anno VII.