Description
-
Boniface VIII (1294-1303)
-
Concedit duas Ecclesias in Civitate Anagniæ pro nova, & commodiori habitatione. ex Reges. Vat. epist. 211. apud Vaddingum in Reg. Pont. n. 45. & ex Petro de Alva n. 3.
-
Anno 1300. die 17. Julii.
-
1300
-
BONIFACIUS &c.
Dilectis filiis ... Guardiano, & Fratribus Ord. Minor. Anagnin.a Salutem, & Apostolicam Benedictionem.
Dum fructus uberes, quos in Ecclesia Dei vester celebris Ordo producit, diligenti consideratione pensamus, dignum non immerito fore conspicimus, ut Apostolica Sedes eumdem Ordinem favoribus gratiosis attollat, & Professores illius gratiis muniat opportunis: Ad hoc namque nostra laborat jugiter charitatis intentio, ut non solùm vobis, sed & aliis possitis proficere ad salutem. Cum itaque vos Monasterium vestrumb, quod circa confessiones audiendas, pœnitentias injungendas, & alia salutis operac incolis Civitatis Anagninæ impenditis, ad quod frequenter, & aliquando etiam nocturnis temporibus, prout necessitas congruit, vos vocari contingit, non possitis libere, prout expedit vobis, in loco, qui dicitur, Colle de Porti, ubi nunc degitisd, manentibus absque magna incommoditate tam vestra, quàm vos ad hoc vocantium exercere. Nos super his non tam vestris, quàm prædictorum incommoditatibus obviare, vobisque in Civitate prædicta de loco magis vobis, & eis commodo providere volentes, Ecclesias Sancti Matthæi, & Sancti Stephani de Portarioe Civitatis prædictæ cum Cœmeteriis, hortis, viis, Plateis, & Domibus adjacentibus, ac etiam circumstantibus ad easdem vobis pro habitatione vestra, & ædificanda ibi Ecclesia, Apostolica auctoritate concedimus, decernentes mansionem vestram fore de cetero in eisdem, ac irritum, & inane, si secus super hoc a quoquam quavis auctoritate contigerit attentari, Priorem, & Fratres Sancti Matthæi Ordinis Sancti Guillelmif, ac Archipresbyterum, & Clericos Sancti Stephani Ecclesiarum prædictarum ab eisdem Ecclesiis penitus amovendo, per Nos alibi, prout Nobis expedire videbitur, collocandos. Nulli ergo omnino hominum liceat hanc paginam nostræ concessionis infringere &c. Datum Anagniæ XVI. Kalendas Augusti, Pontificatus nostri Anno Sexto.
-
Bullarium Franciscanum romanorum pontificum, tomus IV, n°CLXXXVIII., p.507
-
(a) Anagnin.: de quibus videantur litteræ Alexandri IV. Paupertati dilectorum &c. anno 1255. 4. Novembr. in tomo 2. pag. 88. no. (b) & Nicolai IV. Cum a Nobis petitur &c. anno 1290. die 4. Augusti datæ in hoc tomo pag. 166. no. (a f).
-
(b) Monasterium vestrum: aliquid deest, v. g. extra Civitatem habeatis propter.
-
(c) Opera: supple quæ.
-
(d) Nunc degitis: non igitur ad locum S. Blasii anno 1290. acquisitum se transtulerunt Fratres, ut ibi notavimus.
-
(e) De Portario: quòd ad portam vulgariter Romanam al. S. Francisci sita esset; quem locum postea sub tit. S. Francisci Fratres incoluerunt ultra medium XVI. sæculi, quo ad alium, quem modò retinent, translati sunt, ut ibi dicetur.
-
(f) O. S. Guillelmi: ex genere Eremitarum, quibus Alexander Papa IV. anno 1256. & Clemens IV. anno 1266. concessere, ut sub Regula S. Benedicti, & consueto vestium more permanere possent, non obstante, quòd varias Eremitarum Congregationes sub uno Ordine S. Augustini coadunari priùs decreverit idem Alexander IV. Henriquez in Menologio Cistercien. par. 2. pag. 458. & seqq. sed fusiùs de illis agit Joannes Marquez in Orig. Eremit. De hujus Ordinis Institutore, ac primordiis diximus in 2. hujus Bullar. to. pag. 138. no. (d) & pag. 193. no. (b) ejusdemque alumnis Rodulphius lib. 2. pag. 260. ait datam fuisse veterem Ecclesiam, & Cœnobium Fratrum Minorum, quemadmodum patebit ex alia epist. Licèt personas &c. anno 1303. die 3. Julii data, & ibi suo loco exhibenda.