« bullarium-franciscanum-3189 »

BONIFACIUS &c.

Venerabili Fratri Jacoboa Archiepiscopo Jadren.b Sal. & Apost. Benedictionem.

Pastoralis officii cura Nos admonet, ut inter cetera sollicitudinum studia, quibus mens nostra jugiter circumplexa deducitur, de statu Ecclesiarum vacantium attentiùs, & vigilantiùs cogitantes, ad ipsarum provisionem celerem, ne prolixæ vacationis premantur incommodis, dispendiis prægraventur, opem, operamque sollicitam impendamus, earum gubernationem, & regimen talibus committendo personis, per quarum circumspectionem providam, & providentiam circumspectam, favente illius clementia, qui bonorum est omnium elargitor, utiliter dirigi valeant, & salubriter gubernari. Sane Jadren. Ecclesiâ per obitum bonæ memoriæ Henricic Jadren. Archiepiscopi, qui nuper apud Sedem Apostolicam diem clausit extremum, Pastoris solatio destitutâ, Nos ad ejusdem Ecclesiæ quietum statum & prosperum paternæ sollicitudinis studio intendentes, ordinationem, & dispositionem ipsius Ecclesiæ hac vice provisioni Sedis Apostolicæ duximus reservandam, decernentes ex tunc irritum & inane, si secus super hoc scienter, vel ignoranter per quemcumque, seu quoscumque contingeret attentari. Volentes igitur, prout ad nostrum spectat officium, obviare dispendiis, quæ possent ex prolixæ vacationis instantia eidem Jadren. Ecclesiæ imminere; Considerantes etiam probitatis merita grandia, & virtutum dotes multiplices, quibus dono superni Numinis nosceris insignitus, & propterea spem gerentes indubiam, firmamque fiduciam obtinentes, quòd per tuæ laudabilis circumspectionis industriam, cum celebris famæ præconium, quod multorum relatio fide digna confirmat, te referat in spiritualibus & temporalibus circumspectum, præfata Jadren. Ecclesia, Domino favente, proficiet in utrisque, deliberatione cum Fratribus nostris super hoc habitâ diligenti, te Ordinis Minorum Professorem dictæ Jadren. Ecclesiæ de Fratrum ipsorum consilio, & Apostolicæ plenitudine potestatis præficimus in Archiepiscopum & Pastorem, curam, & administrationem ipsius tibi in spiritualibus & temporalibus committentes, tibique facientes per Venerabilem Fratrem nostrum M.d Episcopum Portuen. munus consecrationis impendi, firmâ conceptâ fiduciâ, quòd, dirigente Domino actus tuos, eidem Jadren. Ecclesiæ per tuam curiosam solertiam, tuumque ministerium studiosum honoris & prosperitatis multiplicis, Deo propitio, desiderata proveniant incrementa. Ideoque Fraternitati tuæ per Apostolica scripta mandamus, quatenus nostris & Apostolicæ Sedis beneplacitis sub promptæ humilitatis officio te coaptans, & reverenter suscipiens impositum a Domino tibi onus, ejusdem Jadren. Ecclesiæ curam sollicitam gerere studeas, ejusque vacare profectibus non omittas; Gregem Dominicum tuæ in illa discretioni commissum doctrinâ verbi, & operis informando, ita quòd Ecclesia ipsa per tuæ diligentiæ studium laudabilibus in spiritualibus, & temporalibus ad Divini Nominis gloriam consurgat augmentise. Datum Anagniæ XVII. Kalendas Julii, Pontificatus nostri Anno Quinto.