« bullarium-franciscanum-3183 »

BONIFACIUS &c.

Venerabili Fratria Episcopo Lexovien.b Salutem, & Apostolicam Bened.

Apostolatus officium Nobis quamquam immeritis ex alto commissum, quo Ecclesiarum omnium regimini præsidemus, utiliter exequi adjuvante Domino cupientes solliciti corde reddimur, ac vigiles, ut cum de ipsarum regiminibus agitur committendis, tales eis in Pastores præficere studeamus, qui commissum sibi gregem Dominicum sciant non solum doctrinâ verbi, sed exemplo boni operis informare, ac eis commissas Ecclesias in statu pacifico, & tranquillo velint, & valeant Duce Domino gubernare. Sane dudum Lexoviense Ecclesiâ per obitum bonæ memoriæ G.c Episcopi Lexovien. Pastoris solatio destitutâ, dilecti filii Capitulum ipsius Ecclesiæ pro futuri Episcopi substitutione die ad hoc præfixa vocatis omnibus, qui debuerunt, voluerunt, & potuerunt commode interesse, ut moris est, convenientes in unum, dilectum filium Enricum de Tillejo eorum Concanonicum in minoribus Ordinibus constitutum in Lexovien. Episcopum concorditer postularunt, ac Nobis decretum postulationis hujusmodi præsentantes petierunt, ut illam admittere de benignitate Apostolica dignaremur. Nos autem deliberatione super his cum Fratribus nostris habitâ diligenti, postulationem ipsam ex certis causis non duximus admittendam. Deinde verò de ipsius Lexovien. Ecclesiæ provisione salubri, ac celeri, ne diu vacationis incommodis remaneret exposita, cogitantes, ac volentes eidem talem Pastorem præficere, cujus studio atque curâ posset utiliter gubernari, ad te tunc Redonen. Episcopum, cui litterarum scientia, morum honestas, vitæ munditia, & experientia Pastoralis officii, quod laudabiliter gessisse dignosceris, suffragantur, convertimus aciem nostræ mentis, teque de Fratrum nostrorum consilio, & Apostolicæ plenitudine potestatis a vinculo, quo tenebaris prædictæ Redonen. Ecclesiæ absolventes ad præfatam Ecclesiam Lexovien. trasferimus, præficientes te eidem Lexovien. Ecclesiæ in Episcopum, & Pastorem, curam, & administrationem ipsius tibi in spiritualibus, & temporalibus committendo, liberam tibi dantes licentiam ad ipsius Lexovien. Ecclesiæ regimen. transeundi, firmâ ducti fiduciâ, quòd eadem Ecclesia per tuæ circumspectionis industriam, & providentiam circumspectam, gratia tibi sussragante divina, prospere dirigetur, & gratis, auctore Deo, proficiet incrementis. Jugum itaque Domini reverentiâ promptâ suscipiens, & suavi ejus oneri sub humilitatis spiritu colla submittens sic curam, & administrationem ipsius Lexovien. Ecclesiæ in spiritualibus, & temporalibus prudenter, & utiliter exequaris, quòd Grex tuæ circumspectioni creditus in te salutis Ministrum reperiisse gaudeat, & optatis commodis valeat augumentari, tuque velut Pastor sollicitudine pervigil Ecclesiam ipsam gubernasse fructuoso regimine comproberis, ac exinde cælestis Regni gloriam, & Apostolicæ Sedis gratiam uberiùs merearis. Datum Laterani III. Nonas Februarii, Pontificatus nostri Anno Quinto.