Description
-
Boniface VIII (1294-1303)
-
Ut a Fratribus Ord. Minorum possint Sacramentum Eucharistiæ suscipere demto Paschatis Resur. die. ex Reg. Vat. epist. 317. apud Vaddingum in Pontif. Reges. n. 20.
-
Anno 1296. die 28. Julii.
-
1296
-
BONIFACIUS &c.
Dilectis filiis universis Fratribus, & dilectis in Christo filiabus Sororibus Ordinis Continentium de Pœnitentia S. Francisci vulgariter nuncupatis per Alemanniama constitutis Salutem, & Apostolicam Benedictionem.
Devotionis vestræ precibus benignum impertientes assensum auctoritate vobis præsentium indulgemus, ut vos, qui ob reverentiam Beati Francisci Confessoris, qui Ordinis vestri extitit Institutor juxta salubre super hoc consilium a Sede Apostolica vobis datumb dilectorum filiorum Fratrum Ordinis Minorum doctrinâ dirigimini, & Visitatores vestros de ipsis Fratribus noscimini assumpsisse, possitis ab eisdem Fratribus, quoties fuerit opportunum, Corporis Dominici recipere Sacramentum, præter quàm in festo Resurrectionis Dominicæ, in quo pro divinis officiis audiendis, & eodem Sacramento recipiendo consuevistis in Parochialibus Ecclesiis convenire, dictarum Ecclesiarum Parochialium jure salvo. Nos enim excommunicationis, suspensionis, & interdicti sententias, si quas in vos, seu aliquem vestrum contra præsentis nostræ concessionis tenorem fieri contigerit, irritas decernimus, & inanes. Nulli ergo omnino hominum liceat hanc paginam nostræ concessionis, & constitutionis infringere &c. Datum Anagniæ V. Kal. Augusti, Pontificatus nostri An. II.
-
Bullarium Franciscanum romanorum pontificum, tomus IV, n°LXXXVII., pp.408-409
-
(a) Per Alemanniam: quibus anno superiore per litteras Cupientes cultum &c. die 11. Julii datas indulsit Oratoria.
-
(b) A Sede Apost. vobis datum: præsertim a Nicolao IV. Constitutione Unigenitus Dei &c. anno 1290. edita.