Description
-
Boniface VIII (1294-1303)
-
Infrascriptis Episcopis, ac Provincialibus O. P. & O. Minorum injungit, ut Christifidelibus suæ curæ commissis patefaciant, revocatas fuisse indulgentias a Cælestino V. concessas visitantibus Ecclesiam S. M. de Collemadio. ex Reg. Vat. Pontif. epist. 749. anni 2.
-
Anno 1296. die 23. Julii.
-
1296
-
BONIFACIUS &c.
Venerabilibus Fratribus ... Episcopisa , & dilectis filiis Prioribus Prædicatorum, & Ministris Minorum Provincialibus Ordinum, vel eorum Vicesgerentibus per Anconit. Marchiamb , Ducatum Spoletan.c , Patrimonium Beati Petrid in Tuscia, & Sabiniae ; necnon Perusin.f Tudertin.g Reatin.h Interamnen.i & Tiburtin.j Civitatum, Campaniamk quoque, ac Marittimaml , Marsiamm , & Aprutiumn , ac alia circumvicinia loca constitutis, ad quos litteræ istæ pervenerint Salutem, & Apostolicam Benedictionem.
Ad audientiam nostram dudum ex plurimorum assertione perlato, quòd quondam Petrus de Murrone olim Cælestinus Papa v. prædecessor noster, dum Apostolatus præsideret officio, cui denique sponte cessit, non attendens, quanto sit Summi Apostolatus auctoritatis usus tam in spiritualibus, quàm in temporalibus libramine temperandus; credens forsan animarum saluti consulere, per quod ad delinquendum laxandi habenas occasio præbebatur, quasdam in Ecclesia Sanctæ Mariæ de Collemadioo prope Civitatem Aquilæ indulgentias statueratp, ut qui certis temporibus ad Ecclesiam ipsam accederent, forent a culpa, & pœna delictorum suorum omnium absoluti. Nos considerantes, quòd indulgentiæ hujusmodi plus ad perditionem, quàm ad salutem cedere poterant animarum, indulgentias ipsas, & litteras prædicti prædecessoris super ipsis confectas cujuscumque formæ, vel tenoris extitissent, per speciales litteras nostras revocavimus, cassavimus, annullavimus, & irritavimus omnino, ac nullius fore decrevimus firmitatis, & nihilominus pridem apud Urbem in Basilica Beati Petri in festo Dedicationis ejusdem Basilicæ, præsente tunc multitudine copiosa fidelium, easdem litteras præfati prædecessoris revocandas, cassandas, annullandas, & irritandas duximus, ac nullius firmitatis existere decernendas universis Christifidelibus, ut ad præfatam Ecclesiam Sanctæ Mariæ de Collemadio prætextu indulgentiæ hujusmodi consequendæ sic revocatæ, & irritæ nuntiatæ nullus accederet, districtiùs inhibentes. Nolumus enim, quòd deceptæ Fidelium animæ propter ea laborarent in vanum, & gravarentur laboribus, & expensis. Quocirca Universitati vestræ per Apostolica scripta in virtute obedientiæ districte præcipiendo, mandamus, quatenus per universas Civitates, & Diœceses vestras in Ecclesiis, & prædicationibus coram Populo hujusmodi nostram revocationem, cassationem, annullationem, irritationem, constitutionem, sive decretum, & inhibitionem tandiu publicetis, & faciatis ab aliis, de quibus expedire videritis, publicari, donec id ad singulorum de Civitatibus, & Diœcesibus ipsis notitiam possit verisimiliter pervenisse, aperte prædicentes eisdem, quòd si etiam verbo absque litteris præfatus Prædecessor in jam dicta Ecclesia Sanctæ Mariæ talem, vel similem fortassis licentiam concessisset, illa per Nos extitit revocata. Datum Anagniæ X. Kalendas Augusti, Pontificatus nostri Anno Secundo.
-
Bullarium Franciscanum romanorum pontificum, tomus IV, n°LXXXV., p.407
-
(a) Episcopis: de quibus Ughellus in Italia Sacra.
-
(b) Per Anconitanam Marchiam: quæ maxima pars est Piceni sub ditione Pontificia, terminaturque a Septent. mari Adriatico, Ducatu Urbinatensi ab Ortu, ab Occid. Aprutio ulteriori, & a Merid. monte Apennino.
-
(c) Ducatum Spoletanum: qui nunc Umbria appellatur sub dominio Summi Pontificis, eratque olim extensior, quàm sit in præsenti. Circumscribitur Marchia Anconitana a Septen. Aprutio ulteriori ab Ortu, ab Occid. territoriis Perusino, & Urbevetano, & a Meridie Provincia Patrimonii, & Sabina.
-
(d) Patrimonii D. Petri: de quo in tomo 1. hujus Bullarii pag. 230. (d) 231. (a) & tom. 2. pag. 391. (e).
-
(e) Sabinia: ita nuncupata ab incolis. Olim longiùs extendebatur, nunc angustioribus coarctatur limitibus, videlicet Tiberi fluvio ad Occasum, Aniene ad Merid. Nare, & Velino fluviis ad Boream & Aprutio ulteriori ad Ortum. Ejus tractus, qui vulgò la Sabina appellatur, dominio subest Summi Pontificis, ejusque Episcopus unus est ex sex Purpuratis, qui Pontificem circumstant, quique propiori gradu, hoc est tertio dignitatis titulo ad ipsum accedit.
-
(f) Perusin.: de qua Civitate pluries egimus supra.
-
(g) Tudertin.: de cujus urbe, incolis Todi dictum est in tomo 3. pag. 257. (i), & pag. 456. (b).
-
(h) Reatin.: de qua in tom. 2. pag. 448. (g) & supra in hoc tomo non semel.
-
(i) Interamnen.: incolis Terni, in Umbria de qua supra pag. 217. (i).
-
(j) Tiburtin.: Tibur, italice Tivoli, urbs aliàs Latii, nunc Campaniæ Romanæ in ditione Pontificia 16. milliar. distans a Roma in ortum, & 12. a Tusculo in Boream, estque Episcopalis S. Sedi immediate subjecta.
-
(k) Campaniam: de qua in tom. 2. pag. 391. notâ (i).
-
(l) Marittimam: de qua ibidem (k).
-
(m) Marsiam: eodem in loco (h).
-
(n) Aprutium: incolis Abruzzo in Regno Neapolis. Nunc in citerius, & ulterius dividitur. Ejus limites sunt Marchia Anconitana, & Umbria a Septentrione, Mare Adriaticum ab Oriente, Comitatus Molicinus a Meridie, & Campania Romana ab Occidente.
-
(o) S. Mariæ de Collemadio: quæ erat Ecclesia Monasterii O. B. ubi Cælestinus V. Summus Pontifex inauguratus fuit, ut ex Raynaldo ad ann. 1294. n. 14.
-
(p) Indulgentias statuerat: quarum concessionis formula, fatente ibidem Raynaldo, inusitata videtur.