« bullarium-franciscanum-3085 »

BONIFACIUS &c.

Venerabili Fratria ... Episcopo, & dilectis filiis Lectori Prædicatorum, & ‥ Guardiano Minorum Fratrum Ordinum Florentin.b Salutem, & Apostolicam Benedictionem.

Intenta salutis operibus Apostolicæ Sedis circumspecta benignitas indulta sibi desuper plenitudine potestatis utitur, prout secundùm Deum expedire conspicit secundùm diversitatem negotiorum concurrentium, & exigentiam personarum. Sane intellecto pridem, quòd de contrahendo matrimonio inter dilectum filium nobilem Virum Cursumc Symonis de Donatis de Florentia Militem, & dilectam in Christo filiam nobilem Mulierem Texam filiam quondam Ubertini de Ubertinis ejusdem loci Militis agebatur; quòdque iidem Cursus, & Texa quarto consanguinitatis gradu sibi ad invicem attinebant, Nos ipsi Nobili sub certa forma dari fecimus in mandatis, ut nullatenus sponsalia, vel matrimonium cum dicta Texa contraheret; & si jam forsitan contraxisset, non auderet illud in illa quomodolibet consumare; quòd si forent inter eos sponsalia de facto contracta, vel matrimonium per carnalem copulam consumatum, diverteret alter ab altero, nec insimul habitarent, aut invicem jungerentur, sed a cohabitatione mutua inter se penitus abstinerent, quousque coram competenti Judice docuissent fore ipsis licitum per sponsalia, & matrimonium insimul copulari. Nuper autem fuit Nobis expositum, quòd antequam ad eos mandatum hujusmodi pervenisset, ipsi jam matrimonium inter se invicem per verba de præsenti contraxerant, dictusque Cursus eandem Texam ad ejus domum traduxerat, & carnalis inter eos erat copula subsecuta. Quare Nobis extitit humiliter supplicatum, ut eis de opportuno dispensationis beneficio providere in hac parte misericorditer dignaremur. Nos autem, qui salutem quærimus singulorum; & libenter Christifidelibus quietis commoda procuramus, attendentes, quòd ex quo prædicta Texa, quæ de nobilibus noscitur orta natalibus, cum ipso Curso per carnalem copulam est immixta, si fieret divortium inter ipsos, rubor gravis ipsam afficeret, sexusque fragilitas eam de facili forsan exponeret periculosæ conditionis eventibus, ex quibus posset grave scandalum exoriri: Sicque volentes adhibere salubre consilium in hac parte, quia vos de facto, & facti circumstantiis habere poteritis notitiam pleniorem, præsentium auctoritate vobis committimus, ut si ex eorum divortio credideritis fore scandalum verisimiliter oriturum, & consideratis diligenter aliis circumstantiis, quæ in hac parte fuerint attendendæ, vobis videatur expediens, quòd sit eis in contracto matrimonio remanendi dispensatio concedenda, super quibus vestras intendimus conscientias onerare, cum eisdem Curso, & Texa, quòd impedimento consanguinitatis hujusmodi, & quibuscumque præceptis, & prohibitionibus auctoritate nostra dudum habitis super iis nequaquam obstantibus, in matrimonio ipso libere ac licite remanere valeant, dispensetis, imposita ipsis postmodum pro culpæ modo pœnitentia salutari, & suspensa ad tempus cohabitatione mutua juxta vestræ discretionis arbitrium inter eos, prout secundùm Deum videritis expedire. Datum Romæ apud Sanctum Petrum V. Nonas Maii, Pontificatus nostri Anno II.