« bullarium-franciscanum-3082 »

BONIFACIUS &c.

Dilectis filiis ‥ Decano ‥ Archidiacono, & Capitulo Tullen.a Salutem, & Apostolicam Benedictionem.

Petitionem Venerabilis Fratris nostri Conradib quondam Tullen. Episcopi accepimus continentem, quòd vos audita cessione, ipsius Episcopi nomine per illos, quos idem Episcopus ad hoc Procuratores duxerat statuendos, in manibus nostris facta, equos, boves aliaque animalia, necnon bladumc, vinum, fœnum, suppellectilia, & res alias, quæ fuerant ipsius Episcopi, & tunc temporis possidebat cepistis, seu capi fecistis, necnon pensiones, debita, seu redditus, & proventus, quæ sibi in annis præteritis debebantur, aliaque bona ad eum, ad eleemosynas pauperum, & alios pios usus, & præsertim ad consumationem Monasterii Monialium de Alespachd Ordinis Sanctæ Claræ Basilien. Diœcesis, quod ipse fundaverat, deputata saisivistise, & arrestastisf, seu saisiri, seu arrestari fecistis, eaque omnia sic capta, saisita, & arrestata detinetis, prætendentes quòd ipsa velitis futuro Episcopo conservare: Quare dictus Conradus Nobis humiliter supplicavit, ut providere sibi super hoc de benignitate Apostolica dignaremur. Nos autem ipsi Conrado Episcopo benevolo compatientes affectu, & volentes, quòd ipse, qui facultatum abundantiam sponte dimisit, sentiat in hac parte pro suis honestis desideriis, & dispositionibus per nostram providentiam de speciali gratia relevamen, Universitatem vestram rogamus, & hortamur attente per Apostolica vobis scripta districte præcipiendo mandantes, quatenus bona omnia per vos capta, seu ablatà, saisita, vel arrestata, ut prædicitur, & detenta, prædicto Conrado Episcopo, vel ejus Procuratori legitimo ad hoc specialiter constituto infra unius mensis spatium a receptione præsentium restituere, & assignare curetis. Ita tamen, quòd hujusmodi restitutio facienda summam mille librarumg parvorum Turonen. non excedat. Si quæ verò consumpta fuerint de præmissis, seu quorum restitutio fieri non valeret, vos verum valorem eorum infra prædictam summam Conrado Episcopo restituatis eidem. Alioquin Venerabilibus Fratribus nostrish ... Meten. & ... Basileen. Episcopis, ac dilecto filio Scolastico Ecclesiæ Basileen. de quorum conscientia ea, quæ infra prædictam summam fuerint, ut præmittitur, restituta in eleemosynis pauperum, & aliis piis usibus, & præsertim in consumatione, & utilitate Monasterii supradicti, necnon & pro competenti remuneratione illorum, qui dicto Conrado Episcopo serviverunt, sive sint consanguinei, sive alii juxta servitii meritum, & dispositionem ipsius Conradi Episcopi volumus erogari, damus per alias nostras litteras in mandatis, ut ipsi, vel duo, aut unus eorum per se, vel alium, seu alios vos ad id monitione præmissa per censuram Ecclesiasticam appellatione remota compellat. Non obstante si vobis communiter vel divisim a Sede Apostolica sit indultum, quòd interdici, suspendi, vel excommunicari non possitis per litteras Apostolicas non facientes plenam, & expressam, ac de verbo ad verbum de indulto hujusmodi mentionem, & constitutione de duabus dietis edita in Concilio generali, ac nostra, qua prohibetur ne quis extra suam Civitatem, & Diœcesim ad judicium evocetur, dummodo ultra tertiam, vel quartam dietas aliquis extra suam Diœcesim auctoritate litterarum earumdem ad judicium non trahatur. Ceterum cum sint ad cautelam hæ litteræ duplicatæ nolumus, ut per hoc memorata summa pecuniæ duplicata intelligatur, vel in aliquo augmentata, sed ambæ litteræ pro una tantummodo, & quantitas unica censeantur, & de mille libris prædictis solummodo, & semel dumtaxat fiat solutio, & penitus nihil amplius exigatur. Datum Romæ apud Sanctum Petrum X. Kalendas Maii, Pontificatus nostri Anno Secundoi.