« bullarium-franciscanum-3018 »

CÆLESTINUS &c.

Dilectis filiis ... Priori, & Conventui Monasterii Sancti Benedicti Castri de Nursiaa Ordinis Sancti Benedicti Spoletanæ Diœcesis Salutem, & Apostolicam Benedictionem.

Personas divinis dedicatas obsequiis, & sub jugo Regularis observantiæ constitutas, ne perversorum confringantur insultibus, & tepeat, quod absit, fervor Religionis in eis, libenter Apostolicis præsidiis communimus, ut semper ferventiùs ferveant in Dominicis beneplacitis, & mandatis. Dudum siquidem, sicut asseritis, Abbas, & Conventus Monasterii Sancti Titiib de Valle Casturiana Ordinis Sancti Benedicti in Monasterio vestro, ejusque personis asserentes se plenam jurisdictionem habere, illud, vobis irrequisitis, Ordini Fratrum Minorumc non sine multa præsumptione concessit, Diœcesani Episcopid ad id accedente consensu, cujus concessionis prætextu postmodum Fratres ejusdem Ordinis Fratrum Minorum, associata sibi multitudine armatorum, præfatum Monasterium Sancti Benedicti nequiter invadentes, illud, ejectis inde vobis, & aliis familiaribus vestris, nequiùs occuparunte. Sane fel. record. Honorius Papa f prædecessor noster prædictorum Abbatis, & Fratrum in præmissis præsumptam temeritatem detestans, inductus compassione paterna vos fecit ad dicti Monasterii vestri plenariam possessionem induci, dictis Fratribus Minoribus amotis exinde, & ceteris illud detinentibus occupatum. Ex hoc namque prædictis Fratribus ad gravamina, & graves injurias vestri Monasterii aspirantibus vehementer Andreas Frater ejusdem Ordinis Minorum in partibus illisg Inquisitor hæreticæ pravitatis non sine nota transgressionis notabilis, & conceptæ contra vos iniquitatis fermento, asserens, quòd Monachi Monasterii vestri orthodoxæ Fidei professores sinceri, & Religionis laudabiles zelatores erant hæresis labe respersih, supra hoc contra quosdam ex vobis inquirens, tandem ipsos de crimine hæreseos per iniquam sententiam condemnavit, ut ob hoc coacti formidine beneplacitis acquiesceretis eorum; Cumque id ad ejusdem prædecessoris notitiam pervenisset, ipse prudentiâ multâ conspiciens, quòd hujusmodi Inquisitionis actus, & ex ea sententia subsecuta processerat de pectore nequitiæ veniens corrupto, sententiam ipsam exquisitâ diligentiâ revocavit. Nos itaque approbantes præfatos processus dicti prædecessoris habitos in præmissis, ac volentes insuper quieti vestræ in posterum pleniùs providere, ne deficiatis, quod absit, in via Domini variis impulsibus conquassati, & occasione prædictæ concessionis factæ de ipso Monasterio vestro Ordini prædicto Minorum, quam præsumptione injuriosa præsumptam decernimus nullam firmitatem habere, quoquomodo molestari possitis, vos & Monasterium vestrum ab omni jurisdictione Diœcesani Episcopi, & prædictorum Abbatis, & Conventus Monasterii Sancti Titii auctoritate præsentium eximimus, & sub protectione Sedis Apostolicæ suscipimus speciali, ita quòd nulli omnino liceat in eodem Monasterio vestro sibi jurisdictionis aliquid absque ejusdem Sedis licentia vendicare. Inhibemus quoque, ne absque præsentia Diœcesani ejusdemi, & alicujus Abbatis ipsius Ordinis Sancti Benedicti, prædicto Abbate S. Titii omnino excluso, prædictus Inquisitor, vel alius in posterum deputandus præsumat Inquisitionis officium exercere. Adjicimus etiam statuendo, quòd in eodem Monasterio vestro Ordo Monasticus, qui secundùm Deum, & ejusdem Sancti Benedicti Ordinem noscitur institutus, ibidem perpetuis temporibus inviolabiliter observetur. Nulli ergo omnino hominum liceat hanc paginam nostræ exemptionis, protectionis, inhibitionis, & additionis infringere, vel ei &c. Si quis &c.j Datum Aquilæ Idibus Septembris, Pontificatus nostri Anno Primo.