Description
-
Nicolas IV (1288-1292)
-
Mandat, ut Monasterium S. Petri Taurinen. O. B. in moribus depravatum visitent, corrigant, & reforment. ex Vat. Reg. Pontif. ep. 343. anni 4.
-
Anno 1291. die 7. Julii.
-
1291
-
NICOLAUS &c.
Dilectis filiis ‥ Priori Prædicatorum, & ... Guardiano Minorum Fratrum Ordinum Taurinen.a Salutem, & Apostolicam Benedictionem.
Ad audientiam nostram clamosa insinuatione pervenit, quòd in Monasterio Monialium Sancti Petri Taurinen. Ordinis Sancti Benedictib propter malitiam, & insolentiam personarum degentium in eodem multa committuntur enormia, quæ Deum offendunt, & homines scandalizant. Cum autem dilecta in Christo filia S.c Abbatissa ipsius Monasterii hujusmodi earumdem Personarum excessus propter earum potentiam corrigere nequeat, & Venerabilis Frater noster ....d Episcopuse Taurinen. in corrigendis ipsis fuerit hactenus negligens, & remissus, licèt ei de hujusmodi excessibus plene constet; Nos statum ipsius Monasterii prosperum affectantes, & nolentes excessus ipsos impunitos relinqui, discretioni vestræ, de qua plenam in Domino fiduciam obtinemus, per Apostolica scripta mandamus, quatenus ad Monasterium ipsum personaliter accedentes, & habentes præ oculis solum Deum auctoritate nostra visitetis, inquiratis, corrigatis, & reformetis tam in capite, quàm in membris, quæ visitationis, correctionis, & reformationis officio noveritis indigere, contradictores per censuram Ecclesiasticam appellatione postposita compescendo. Non obstante si aliquibus a Sede Apostolica sit indultum, quòd interdici, suspendi, vel excommunicari non possint per litteras dictæ Sedis non facientes plenam, & expressam de indulto hujusmodi mentionem, aut indulgentia, si qua &c. Datum ut supra.
-
Bullarium Franciscanum romanorum pontificum, tomus IV, n°DVI., p.268
-
(a) Taurinen.: Civitatis, & Conventus meminimus in 2. to. pag. 40. qui Conventus quondam primus erat Custodiæ Pedemontis in Provincia Januensi apud omnes nostri ordinis Scriptores. Nunc verò suæ Provinciæ caput existit, cum anno 1725. instante Victorio Amedeo Sardiniæ Rege, Duce Sabaudiæ &c. per diploma Benedicti Papæ XIII. die 7. Decembris datum Provincia hæc erecta fuerit Sanctissimæ Syndonis nomine appellata, ac in quinque Custodias divisa, desumptis Conventibus ex Januensi, Mediolanensi, S. Ludovici, & Burgundiæ Provinciis.
-
(b) Ord. S. Bened.: de quo nihil apud Mabillonium.
-
(c) S.....
-
(d) F. noster .... Gaufridus, seu Goffredus de Montenario Vercellensis, qui ab anno 1264. usque ad an. 1299. quo obiit, hanc gubernavit Ecclesiam ex Ughello tom. 4.
-
(e) Episcopus: at nunc Metropolita, nam sub Leone PP. X. Archiepiscopali dignitate decorata fuit Taurinen. Civitas, non an. 1504. ut errando asserit Coronellus; (Leo etenim Pontifex inauguratus est an. tantùm 1513.) sed an. 1515. die 12. Maii, ut ex Ughello in Italia Sac. ubi Leonis diploma exhibetur.