« bullarium-franciscanum-2893 »

NICOLAUS &c.

Dilectis filiis ‥ Præposito Sancti Petri de Duacoa Atrebaten.b Diœcesis, & ‥ Scolastico Tornacen.c Ecclesiarum Salutem, & Apostolicam Ben.

Significarunt Nobis dilecti filii ... Guardianus, & Fratres Ordinis Minorum Cameracen.d quòd cum olim occasione Loci, quem ipsi in Civitate Cameracensi obtinent, ex parte una, & ‥ Præpositum, ac Capitulum Ecclesiæ Cameracen. ex altera esset materia quæstionis exorta, tandem super hoc de consensu bonæ memoriæ Nicolai Cameracen. Episcopi, quædam inter partes amicabilis compositio intervenit, in qua inter alia continetur, quòd porta introitus dicti loci in alio loco, quàm in illo, in quo nunc est, fieri nequeat, vel haberi, sicque ipsorum Ecclesiâ consumatâ, & eâdem portâ in suo statu remanente, non aliunde, quàm per medium ejusdem Ecclesiæ ex transverso introitus ad Guardianum, & Fratres commode pateret eosdem. Postmodum verò eisdem Guardiano, & Fratribus Nobis humiliter supplicantibus, ut cum hujusmodi porta in honestiori parte Loci prædicti, ac tam dictis Guardiano, & Fratribus, quàm aliis ad locum ipsum accedentibus magis accomoda ædificari valeret, & ipsi parati essent pro damno, seu præjudicio, quod per mutationem dictæ portæ fieri, vel generari posset, recompensationem facere congruentem, super hoc eis paternâ dignaremur diligentiâ providere; Nos eosdem Præpositum, & Capitulum rogandos duximus attentiùs, & hortandos nostris dantes eis litterise in mandatis, ut Guardianum, & Fratres eosdem habentes in hac parte pro Dei, & nostra, ac Apostolicæ Sedis reverentia favorabiliter commendatos, eis ad arbitrium bonorum virorum recompensationem sibi exhibentibus competentem mutandi portam prædictam in loco, qui magis eis aptus videretur, licentiam concederent, compositione hujusmodi non obstante. Verùm Præposito, & Capitulo prædictis precibus, & mandatis hujusmodi obauditis, & id efficere non curantibus, iidem Guardianus, & Fratres ad nostram super hoc iteratò providentiam recurrentes, Nobis humiliter supplicarunt, ut providere ipsis super hoc de opportuno remedio curaremus. Quia sicut prædictos Fratres sui Ordinis sacra Religio dignos favore constituit, Nos volentes eis in hac parte taliter providere, ne vacuis laboribus propter hoc ulteriùs implicentur, discretioni vestræ per Apostolica scripta mandamus, quatenus vos, vel alter vestrum Præpositum, & Capitulum præfatos ex parte nostra moneatis efficaciter, & etiam inducatis, ut eisdem Guardiano, & Fratribus mutandi portam prædictam in loco, qui magis ipsis aptus videbitur, ab eis pro damno, & præjudicio, quod dictis Præposito, & Capitulo exinde generari posset, recompensatione juxta vestrum arbitrium competenti recepta, licentiam juxta prædictarum litterarum nostrarum directarum eis sine difficultate concedant, compositione hujusmodi non obstante, ipsos ad id, si necesse fuerit, per censuram Ecclesiasticam appellatione postposita compescendo. Non obstante, si dictis Præposito, & Capitulo a Sede Apostolica sit indultum, quòd interdici, suspendi, vel excommunicari non possint per litteras Apostolicas, quæ de indulto hujusmodi plenam, & expressam non fecerint mentionem, sive qualibet alia dictæ Sedis indulgentia, de qua oporteat in nostris litteris plenam, & expressam mentionem fieri, & per quam effectus præsentium impediri valeat, vel differri. Datum ut supra.