« bullarium-franciscanum-2688 »

NICOLAUS &c.

Dilectis filiis ... Abbati Monasterii Staden.a Ordinis Sancti Benedicti Bremen.b Diœcesis ... Priori Prædicatorum, & ‥ Guardiano Minorum Fratrum Ordinum Bremen. Salutem, & Apostolicam Benedictionem.

Dudum Monasterio de Rossenveldec ad Romanam Ecclesiam nullo medio pertinente Ordinis Sancti Benedicti Bremen. Diœcesis per mortem quondam Hermanni Abbatis ipsius Monasterii Pastoris regimine destituto, dilecti filii Conventus ejusdem Monasterii, vocatis omnibus, qui voluerunt, debuerunt, & potuerunt commode interesse, die ad eligendum præfixa, ut moris est, convenientes in unum pro futuri substitutione Pastoris, & tandem per viam scrutinii procedentes in dilectum filium Johannem dictum Westnal ipsius Monasterii Monachum, virum utique idoneum, in suum, & ejusdem Monasterii Abbatem unanimiter, & concorditer elegerunt, ac idem Johannes electioni hujusmodi de se factæ, sibique infra legitimum temporis spatium præsentatæ consensit, sed propter multam ipsius Monasterii paupertatem præfatus Johannes ad Apostolicam Sedem se personaliter infra tempus a jure statutum conferre non potuit ad hujusmodi electionis suæ negotium prosequendum. Quare pro parte Conventus ejusdem a Nobis humiliter petebatur, ut ipsius Monasterii statui pio compatientes affectu providere super hoc de Apostolicæ benignitatis clementia dignaremur; Gerentes itaque de vestræ circumspectionis industria fiduciam in Domino specialem, & sperantes firmiter, quòd ea, quæ vobis committimus, studeatis exequi diligenter, discretioni vestræ per Apostolica scripta mandamus, quatenus habentes præ oculis solum Deum, si electionis prædictæ diligenter examinato processu, electionem ipsam inveneritis esse canonicam, & de persona idonea canonice celebratam, eam auctoritate nostra confirmare curetis, facientes eidem Electo per aliquem vicinum Episcopum, non Loci ordinarium, gratiam, & communionem Apostolicæ Sedis habentem munus benedictionis impendi, eique a suis Subditis debitam obedientiam, & reverentiam exhiberi, non obstante quòd propter nimiam, sicut dicitur, ejusdem Monasterii paupertatem, jus suum, prout tenebatur, prosecuturus personaliter ad Sedem ipsam venire non potuit, super quo suam excusationem benigne duximus admittendam; Recepturi postmodum ab eodem nostro, & Ecclesiæ Romanæ nomine fidelitatis solitæ juramentum juxta formam, quam vobis sub bulla nostra dirigimus interclusam; Alioquin, electione prædicta rite cassata, faciatis eidem Monasterio de persona idonea per electionem canonicam, seu postulationem concordem prædictum Conventum ipsius Monasterii provideri, contradictores per censuram ecclesiasticam appellatione postposita compescendo. Formam autem juramenti, quod ipse præstabit, per vestras & ipsius patentes litteras suo sigillo signatas per proprium Nuntium Nobis quantocius transmittatis. Non obstantibus indulgentiis, per quas vobis Prior, & Guardiane, seu vestris Ordinibus ab eadem Sede dicitur esse concessum, quòd non teneamini vos intromittere in quibuscumque negotiis, quæ vobis per ipsius Sedis litteras committuntur, nisi in eis de indulto hujusmodi plena, & expressa mentio habeatur; Quòd si non omnes iis exequendis interesse potueritis, duo vestrum ea nihilominus exequantur. Datum apud Urbem veterem Decimo Kalendas Augusti, Pontificatus nostri anno Tertio.

Forma juramenti.

Ego ... Abbas Monasterii de Ressenvelde ad Romanam Ecclesiam nullo medio pertinentis Ordinis Sancti Benedicti Bremen. Diœcesis &c.d.