« bullarium-franciscanum-2600 »

NICOLAUS &c.

Dilecto filio ‥ Ministro Fratrum Minorum Provinciæ S. Franciscia Salutem, & Apostolicam Benedictionem.

Necessitates miserabilis Terræ Sanctæb multiplices, antiquas, & novas non absque gravi amaritudine intra mentis nostræ præcordia recensentes, atque ad plenam liberationem ipsius, & interim ad subventionem locorum, quæ in præsentiarum Christianitas obtinet in eadem, Nos & Fratres nostri intensis desideriis suspirantes, inter multa operosa subsidia, quæ ipsi Terræ, Deo auspice, fructuosa sedulò procurare, atque impendere studuimus, & studemus, de ipsorum Fratrum consilio per diversas Mundi partes Christicolis verbum Crucis deliberavimus proponendum. Ad exequendum in Provincia tibi commissa deliberationem hujusmodi te, ac Fratres Ordinis tui eò confidentiùs eligentes, quò magis ad id vestræ Religionis debitum vos invitat. Ideoque prædicandæ ipsius vivificæ Crucis ministerium in eadem Provincia tibi, & sex Fratribus ejusdem Ordinis maturis, & discretis, atque ad hujusmodi aptis officiis, quos de discretorum Fratrum consilio duxeris eligendos, præsentium auctoritate committimus in remissionem peccaminum injungentes, quatenus tu, & iidem eligendi Fratres in eodem officio juxta datam vobis a Deo prudentiam procedentes illud efficaciter, & prudenter, non obstante, quòd hoc idem aliis etiam sit commissumc, exequi studeatis: omnes & singulos Fidei orthodoxæ cultores prædicationibus crebris, & sedulis exhortando, ut ad retundendos impiæ gentis impetus, compescendos insultus, & superbiam conterendam victoriosum ejusdem vivificæ Crucis signum devote suscipiant, & illud propriis affigentes humeris, ac magis cordibus imprimentes, reverenter, ac publice deferant, atque ad celerem præfatæ Terræ succursum promptis animis, totisque viribus se accingant. Quod quidem venerabile signum per vos concedi volumus cunctis devote petentibus, quibus Dominus inspiravit, ut illuc vel personaliter ire, vel de facultatibus propriis ad tam pium negotium prosequendum velint subsidium impertiri. Insuper omnes, qui hactenus idem signum pro eodem subsidio susceperunt, monere, ac inducere procuretis, ut illud, si forte dimiserint, resumentes alacriter, Terræ præfatæ studeant efficaciter subvenire. Cum autem omnibus Christifidelibus, qui Cruce suscepta eidem Terræ succursum impenderint opportunum, unicuique, secundùm proprium meritum, Indulgentiam salutarem, ac maxime illis, qui in ipsius Terræ subsidium vel personaliter ibunt, vel bellatores, aut alios viros idoneos juxta facultatum suarum exigentiam in propriis sumptibus destinabunt, multiplicium gratiarum beneficia concedamus, sicut in aliis nostris litterisd, quæ universis diriguntur Christicolis, seriosiùs continetur, earumdem litterarum tenorem per te, ac Fratres a te, ut præmittitur ad prædicandæ Crucis officium eligendos volumus populis Christianis frequenter, & diligenter exponi. Ita siquidem proinde quòd & beneficia supradicta, quæ ipsis in Terra concedimus, & copiosam mercedem, quæ ipsis præparatur in Cælis, cognoscere valeant, & amare. Nec tamen ex verbis vestris concipiant, se aut plenam in casibus, in quibus nequaquam conceditur, aut majorem, quàm concedatur, indulgentiam promereri. Ipsos autem populos ad certa, & idonea loca, quoties expedire videritis, convocandi ad verbum Crucis salubriter audiendum, ac omnibus vere pœnitentibus, & confessis, qui ad hujusmodi vestras prædicationes convenerint, & idem verbum audierint reverenter, centum dies de injunctis sibi pœnitentiis relaxandi vobis auctoritate præsentium concedimus facultatem. Si quando autem ad Ecclesias Interdicto suppositas vos devenire contigerit, liceat vobis ad ipsas populos convocare, ac verbum Crucis proponere in eisdem, necnon excommunicatis, & interdictis exclusis, non pulsatis campanis, submissa voce, januis clausis, cum vestris Sociis divina officia celebrare. Ad hæc, si qui proficiscentium in jam dictæ Terræ subsidium, seu destinantium viros idoneos juxta suarum exigentiam facultatum excommunicationis essent vinculo innodati pro violenta injectione manuum in Clericos sæculares, aut etiam Religiosos, dummodo non fuerit excessus difficilis, & enormis, & passis injuriam satisfaciant competenter, sive pro eo quòd sepulcrum Dominicum visitare, seu ad Siciliæ Insulam, vel ad aliàs Terras accedere, vel cum Siculis, aut aliis quibuscumque communicare in mercimoniis, seu aliis modis contra prohibitionem Ecclesiæ præsumpserunt, dummodo ipsis contra Romanam Ecclesiam non dederint aliàs consilium, auxilium, vel favorem, nec arma, seu merces prohibitas portaverint Saracenis, absolvendi eosdem cum prædictis sex Fratribus, ac dispensandi cum Clericis, qui cum excommunicationis sententiam latam a Canone, vel ab homine incurrissent, irregularitatis notam, immiscendo se divinis officiis, contraxerunt, tibi, ac tribus ex prædictis sex Fratribus prædicti Ordinis tui, quos ad hoc de consilio discretorum Fratrum elegeris, concedimus potestatem. Porro, quia dignus est operarius mercede sua, tibi, & Fratribus memoratis in hoc divino fideliter laborantibus opere, præter mercedem æternam, quam meritò sperare potestis, quotiescumque studueritis populis ad hoc specialiter convocatis proponere verbum Crucis, centum dierum Indulgentiam elargimur, ac vos Indulgentiæ memoratæ, quæ transfretantibus in subsidium sæpedictum conceditur, juxta laboris vestri mensuram volumus participatione gaudere. Denique, si quos ex Fratribus, quos, ut supra dicitur, ad exequenda præmissa duxeris eligendos, ab executione hujusmodi sive per mortem, sive aliàs quomodolibet impediri, vel per tuam fortè providentiam removeri contigerit, facultatem tibi concedimus loco ipsorum alios subrogandi. Datum Romæ apud S. M. Majorem Nonis Jan. Pont. nostri An. II.e.