« bullarium-franciscanum-2509 »

NICOLAUS &c.

Dilectis Filiis ... Priori Prædicatorum & Guardiano Minorum Fratrum Ordinum Regin.a Salutem, & Apostolicam Ben.

Petitio ex parte Communis Regin. Nobis exhibita continebat, quòd, cum olim inter dilectos Filios Nobiles de Canossab, & alios Cives Reginenses eis adhærentes ex parte una, & illos de domo Robertorumc, ac alios suos sequaces concives eorum ex altera, seminatore discordiæ ac pacis æmulo procurante, graves essent discordiæ suscitatæ, quarum occasione multa, præter damna rerum, personarum, & quod gravius est, animarum pericula evenerunt; quidam eorum communes amici ad reformandam pacem inter eos interposuerunt efficaciter partes suas, quibus mediantibus pax & concordia inter eosdem concives, divina cooperante gratia, intervénit; & ad pacem hujusmodi solidandam actum est inter eos, quòd Raynerius natus Nobilis viri Rolandini de Canossa Militis Domicellus Remengardam Natam Nobilis viri Guidonis dicti de Tripoli Militis de prædicta domo Robertorum recipiat in uxorem. Verùm quia dictus Raynerius tunc infra pubertatis tempora constitutus cum quondam Johannina filia Nobilis viri Garlen- annulo subarrando, quæ incognita demum a Raynerio prædicto decessit, & eadem Johannina dictæ Domicellæ quarto consanguinitatis gradu, dum viveret, attinebat, inter ipsum Raynerium, & dictam Remengardam Matrimonium, obstante publicæ honestatis justitiâ, intervenire non potest sine Apostolicæ Sedis licentia speciali. Quare Nobis humiliter supplicarunt, ut paci & tranquillitati ejusdem Civitatis, quæ occasione dictæ discordiæ damna plurima est perpessa, providere misericorditer dignaremur. Nos igitur, qui pacem cunctorum appetimus, eorum supplicationibus inclinati, discretioni vestræ, de qua plenam in Domino fiduciam obtinemus, præsentium tenore committimus, quatenus de præmissis solicite inquirentes, super quibus vestras intendimus conscientias onerare, si ea inveneritis ita esse, cum Raynerio, & Domicella prædictis, quòd impedimento hujusmodi non obstante possit matrimonium licite contrahere, ac in contracto licite remanere, auctoritate nostra dispensare curetis. Non obstante, quòd vobis, aut Ordini vestro a Sede Apostolica est concessum, quòdd &c. Datum Romæ apud Sanctam Mariam Majorem sexto Nonas Maii, Pontificatus nostri Anno Secundo.