« bullarium-franciscanum-2500 »

NICOLAUS &c.

Charissimo in Christo Filio Rodulpho Regi Romanoruma Illustri Salutem, & Apostolicam Benedictionem.

Nuper ad Nostram præsentiam accedentes dilectos filios Fratrem Bruchardum Magistrum Hospitalis S. Mariæ Theutonicorum Jerosolimitan.b & Magistrum Henricum Protonotarium tuum Regiæ celsitudinis Nuncios libenter vidimus, & affectuose recepimus intuitu destinantis, & quæ coram Nobis per eos, quos de solicitudinis studio commendamus, ex parte Regiâ fuere proposita, benigno auditu percepimus, plenoque collegimus intellectu. Ex quorum revelante propositione didicimus, quòd processibus Regiis, ejus, a quo gressus hominum diriguntur, favente clementia, æstate proximo secutura, sive circa hyemis futuræ principium, si ad hoc Sedis Apostolicæ beneplacitum accedat, intendis stabiliter ad partes Italiæ te conferre, Diadema Imperii de nostris manibus Actore Domino suscepturus. Porro, fili charissime, Romana Mater Ecclesia sibi non absque uberi delectatione commemorat, ac ingenti jucunditate recenset, quòd erga ipsam a longis retro temporibus, priusquam honoris Regii culmen ascenderesc, & etiam postea sinceræ devotionis fervorem, & reverentiæ filialis affectum, quos tamquam Deo devotus Princeps, & ad opera pietatis expositus. laudabiliter continuare non desinis, gerere studuisti: propter quod anxia noscitur, redditurque solicita, ut per suæ cooperationis effectum Magnificentiæ tuæ status felicibus semper fulciatur eventibus, & votivis successibus foveatur, cum Ecclesia eadem, quæ quantùm cum Deo posse se existimat, promptis affectibus annuit votis tuis, proprium reputet exaltationis Regiæ incrementum. Nos autem super iis cum Fratribus nostris contulimus diligenter, & tandem consideratis attentiùs, perpensâque deliberatione discussis, quæ in tanti prosecutione negotii requiruntur, quia præfixus de tuo ad Coronam adventu terminus, supervenientibus impedimentis, effectum non habuitd, honori Regio credimus expedire, ut ad te Nostrum Nuncium mitteremus, per quem & tuæ Nobis intentionis processus patéret apertiùs, & Nos certitudine habita pleniori possemus Celsitudini Regiæ meliùs, & competentiùs respondere: Nam alii tui Nuncii contra nostrum eis impensum consilium, dum eramus in minori officio constituti, se ad brevitatem termini nimiùm arctaverunt. Gerentes igitur de Venerabili Fratre Nostro Benevenuto Episcopo Eugubinoe latore præsentium, viro utique provido, & discreto, ac Nobis & eisdem Fratribus, meritis suæ multiplicis probitatis accepto fiduciam in Domino pleniorem, ipsum ad te propter hoc specialiter destinamus, Excellentiam Regiam rogantes attentiùs, & hortantes, quatenus pro nostra, & Apostolicæ Sedis reverentia præfatum Episcopum benigne recipiens, & honeste pertractans, solicite audias, & intelligas diligenter, quæ super hoc ex parte nostra Magnificentiæ Regiæ duxerit explicanda. Datum Romæ apud S. Mariam Majorem Idibus Aprilis, Pontificatus nostri Anno Secundo.