« bullarium-franciscanum-2497 »

NICOLAUS &c.

Dilectis Filiis ‥ Priori Prædicatorum, & ‥ Guardiano Minorum Fratrum Ordinum, ac Simeoni Primicerio Ecclesiæ Sancti Marci de Venetiisa Castellan. Diœcesis Salutem, & Apostolicam Benedictionem.

Ne virgæ vigilantis officium inofficiose gerere videamur, expedit, ut cum Ecclesiarum omnium sit Nobis solicitudo commissa, eas cum expedit visitemus, corrigendis correctionis virgam salubriter opponendo, quæ consequenter consolationis etiam virga meritò sit dicenda. Dudum siquidem dilecto Filio nostro H.b tituli S. Sabinæ Presbytero Cardinali primò, ut ea, quæ quondam Nicolaus tunc vivens, & Zavinus Monachi Monasterii S. Nicolai in Littorec de Venetiis Ordinis S. Benedicti Castellanæ Diœcesis contra Franciscum ejusdem Monasterii Abbatem, & postmodum ut ea, quæ idem Abbas contra eosdem Monachos vellet proponere, diligenter audiret, & demum utrum super propositis publicâ laboraret infamiâ, per testes producendos hinc inde apud Sedem Apostolicam consistentes veritatem inquireret, Nobisque, quæ inveniret, referret fideliter, commisimus oraculo vivæ vocis. Verùm licèt antequam idem Cardinalis in negotio ipso procederet, præfatus Zavinus renuntiaverit expresse iis, quæ contra Abbatem prædictum objecerat, eodem tamen Cardinali procedente postmodum in hujusmodi inquisitionis negotio juxta traditam sibi formam, idem Abbas in nostra constitutus præsentia inquisitioni faciendæ in ipso Monasterio se sponte subjecit. Cum igitur nostrum sit condescendere, & videre, utrum clamor, qui ad aures nostras usque pervenit, opere compleatur; Discretioni vestræ, quam speramus, ut zelus comedat Domus Dei, per Apostolica scripta mandamus, quatenus ad dictum Monasterium personaliter accedentes, & habentes præ oculis solum Deum, gratiâ, odio & timore postpositis, super excessibus ejusdem Abbatis, & aliorum Monasterii prælibati inquiratis plenissime veritatem, corrigendo & reformando ibidem tam in capite, quàm in membris quæ correctionis, & reformationis officio noveritis indigere, & quæ secundùm Deum, & B. Benedicti Regulam statuenda videritis statuatis, non parcentes aliquibus, sed ratione prævia potiùs procedentes, ut dignam super hoc in extremo examine Deo possitis reddere rationem, nec permittatis, Raynaldum, & alios supradicti Monasterii Monachos, qui inquisitionem hujusmodi prosequuntur, inquisitione ipsa coram vobis durante, ab aliquibus indebite molestari, molestatores hujusmodi per censuram Ecclesiasticam, appellatione postposita, compescendo. Non obstante, si aliquibus a Sede Apostolica sit indultum, quòd interdici suspendi vel excommunicari non possint per litteras Sedis ejusdem, quæ de indulto hujusmodi plenam & expressam non fecerint mentionem: Aut si vobis Filii ‥ Prior, & ‥ Guardiane, vel Fratribus vestrorum Ordinum a Sede sit præfata indultum, ut non teneamini vos intromittere de quibuscumque negotiis, quæ vobis per ipsius Sedis litteras committuntur, nisi in eis de indulto hujusmodi plena & expressa mentio habeatur, & qualibet alia dictæ Sedis indulgentia, per quam effectus præsentium valeat impediri. Volumus autem, ut hujusmodi inquisitionis correctionis & reformationis vestræ modum & formam vestris litteris harum seriem continentibus fideliter rescribatis. Quòd si non omnes iis exequendis interesse potueritis, duo vestrum ea nihilominus exequantur. Datum Romæ apud S. Mariam Majorem VIII. Kalendas Aprilis, Pontificatus nostri Anno Secundo.