« bullarium-franciscanum-2413 »

NICOLAUS &c.

Dilectis Filiis universis Fratribus Ordinis Minorum inter Tartaros de mandato, vel ordinatione, seu licentiâ, aut permissione Sedis Apostolicæ constitutisa Salutem & Apostolicam Benedictionem.

In Apostolicæ servitutis vigiliis hoc desiderium viget præcipuum, hoc quidem cæteris quasi singulare præfertur, ut cunctos, sed potissime orthodoxæ fidei professores per ministerium operosæ solicitudinis gratiæ restituamus divinæ, a qua illos & mandatorum Domini, & sacrorum Canonum transgressio elongavit: Non enim humanæ fragilitatis conditio formidat præoccupationis subitæ jaculum, si præmunita fuerit scuto consilii salutaris. Nuper nempe consideratione inter meditationes, quæ mentis nostræ claustrum lustrant, assidue consurgente, quòd renati fonte Baptismatis conversantes inter exteras nationes, communionem Ecclesiæ Catholicæ non habentes, per injectionem manuum in Personas Ecclesiasticas in sententiam excommunicationis plerumque incidunt a canone promulgatam; quòdque talibus est admodum difficile pro absolutionis beneficio eamdem Sedem adire: Nos volentes super hoc de remedio sic salutari consulere, ut hosti salutis hujusmodi ligatos sententiâ non sit habilitas rapiendi, de vestra circumspectione confisi, absolvendi hujusmodi manuum injectores, dummodo passis injuriam satisfaciant competenter, quotiens opus fuerit, juxta formam Ecclesiæ ab ejusmodi excommunicationis sententiâ; & dispensandi cum eis, si Clerici fuerint, super irregularitate, si quam sic ligati divina officia celebrando, vel se illis immiscendo, forsitan contraxerunt: Scismaticos quoque, sive hæreticos directionis supernæ luce perfusos, cupientes redire ad Ecclesiasticam unitatem reconciliandi, & reducendi ad eam; ac benedicendi pallas Altaris, corporalia, & vestes sacerdotales, vobis universis liberam, auctoritate præsentium, concedimus facultatem. Datum Romæ apud Sanctum Petrum V. Idus Aprilis, Pontificatus nostri Anno Primo.