« bullarium-franciscanum-2410 »

NICOLAUS &c.

Venerabili Fratri Yaulahæ Episcopo in partibus Orientisa Sal. & Ap. Ben.

Copiosæ benignitatis affectu recepimus litteras, quas Nobis Venerabilis Frater noster Bersauma Episcopus in partibus Orientis, nobilis vir Sabadinus, Thomas de Amfusis, & Uguetus interpres, laici Nuntiib Regis Tartarorum illustris ex parte tuâ præsentare curarunt; & quæ continebantur in illis, pleno collegimus intellectu, benignæ tuæ providentiæ studium plenis in Domino laudibus efferentes, quòd sicut Nobis ex litteris ipsis innotuit, dilectos Filios Fratres Ordinis Minorum in partibus ipsis morantes ad serenda inibi salutis semina, & in fide catholica illarum incolas informandos uberi favore prosequeris, & gratiosâ exhibitione pertractas; de quo tibi eò fœcundiores gratiarum referimus actiones, quò id ex majori benignitate dignoscitur processisse. Fraternitatem tuam rogantes attentiùs, & hortantes, quatenus Fratres ipsos intuitu Dei, cujus prosequuntur obsequia, & pro Apostolicæ Sedis, & nostrâ reverentiâ recommendatos propensiùs habeas, & favorabiliter prosequaris, ut tui favoris ope suffulti utiliùs, & efficaciùs salutis opera prosequi valeant, quæ exercent; Tuque provide ab omnium Retributore bonorum condigna præmia consequaris. Cæterùm quia Clerus, & Populus tibi subjecti a Romana Ecclesia, quæ veluti pia Mater cunctorum salutem solerter exquirit, cunctosque desiderat æternæ beatitudinis effici possessores, longo maris, terræque spatio sunt remoti, non possunt ad eam commodè se conferre, ac facilè habere recursum pro recipienda doctrina, & informatione fidei christianæ: Nos præfatos Clerum & Populum tenere fidei puritatem, quam Romana tenet, & servat Ecclesia, cupientes; dictam fidem, & ejus formam, quæ annotantur inferiùs, tibi duximus destinandas, tuæ diligentiæ studium solicitiùs exhortando, ut mentis oculis erectis ad Dominum eosdem Clerum & Populum in fide prædictâ solerter instruas, & informes; easque frequenter amplecti, & diligenter observari procures, ut tanquam Minister idoneus Clerum, & Populos supradictos ad loca perducere valeas pascuæ salutaris. Fides autem prædicta, & forma ejus hæ sunt. Credimus Sanctam Trinitatemc &c. Datum, ut supra &c.