« bullarium-franciscanum-2398 »

HONORIUS &c.

Venerabili Fratri Jarundo quondam Amaren.a Episcopo Nidrosien.b Electo Salutem, & Apost. Benedictionem.

Debitum pastoralis officii ex alto Nobis commissi requirit, ut inter sollicitudines alias, quibus assiduè premimur, specialiter circa Ecclesias solertiam adhibentes ipsarum utilitatibus intendamus in eo maximè, ut viduatis Ecclesiis, ne longæ vacationis dispendia patiantur, celeriter Nostræ diligentiæ studio de illorum provideatur substitutione Pastorum, per quos spiritualiter & temporaliter auctore Domino continuum suscipiatur incrementum. Dudum siquidem Nidrosiensi Ecclesiâ per obitum bonæ me: Johannisc Archiepiscopi Nidrosien. vacante; Capitulum ipsius Ecclesiæ Venerabilem Fratrem Nostrum Nervam Bergen.d Episcopum in ejusdem Nidrosien. Ecclesiæ Archiepiscopum per viam scrutinii postularunt; & eis petentibus postmodum a fel. record. Martino Papa e prædecessore Nostro hujusmodi postulationem admitti; idem prædecessor examinationem decreti, & processus postulationis ejusdem Venerab. Fratri Nostrof … Ostien. Episcopo, & bonæ memoriæ Ancherog Tituli Sanctæ Praxedis Presbytero, & dilecto Filio Nostro Matthæo Sanctæ Mariæ in Porticu Diacono Cardinalibus examinationem commisit, qui post diligentem examinationem factam de illis processus, & decretum eosdem canonicos invenerunt. Deinde verò eodem prædecessore viam universæ carnis ingressoh, & Nobis postmodum ad apicem Apostolatus assumptis, dilectus Filius Magister Petrus Sanctæ Romanæ Ecclesiæ Vicecancellarius quasdam litterasi, quas sub nomine ipsius prædecessoris confectas eo vivente receperat; & quæ propter ipsius obitum non fuerunt bullatæj, Nobis legere procuravit, in quibus sub ipsius prædecessoris nomine Dilectis Filiis … Abbati Monasterii Sanctæ Mariæ de Tuta Insula Cistercien. Ordinis Nidrosien. Diœcesis, & … Priori Prædicatorum Nidrosien., ac Guardiano Fratrum Minorum Bergen. inter alia mandabatur ut ipsi Deum habentes præ oculis, si eumdem Episcopum, diligenti inquisitione per eos facta de ipso, vitâ, moribus, honestate, scientiâ, & aliis virtutum meritis invenirent esse ydoneum, atque dignum ad supportationem Archiepiscopalis oneris, & honoris, ipsum a vinculo, quo Ecclesiæ Bergensi teneretur, auctoritate Apostolicâ absolventes eum prædictæ Ecclesiæ Nidrosiensi præficerent in Archiepiscopum & Pastorem, curam, & administrationem ipsius sibi spiritualiter, & temporaliter committendo, ac facerent sibi a suis subditis obedientiam, & reverentiam debitam exhiberi, recepturi ab eo postmodum pro dicto Prædecessore, & Ecclesiâ Romanâ fidelitatis solitæ juramentum. Alioquin postulatione prædictâ ritè cassatâ facerent eidem Nidrosien. Ecclesiæ de personâ ydoneâ per electionem, seu postulationem canonicam per Capitulum ipsius Nidrosien. Ecclesiæ provideri; Contradictores per censuram ecclesiasticam appellatione postpositâ compescendo. Nosque postmodum hujusmodi earumdem litterarum intellecto tenore, volentes favorabiliter prosequi, quod idem prædecessor inchoaverat in hac parte … Abbati, … Priori, & … Guardiano prædictis per Nostras mandavimus litterask, ut præmissa juxta prædictarum litterarum tenorem exequi procurarent. Iidem quoque Abbas, Prior, ac Guardianus juxta earumdem litterarum Nostrarum tenorem in negotio hujusmodi procedentes, & per eos postulatione præfatâ de dicto Bergen. Episcopo factâ ex certis & legitimis causis ritè cassatâ; præfati Capitulum de Abbatis, Prioris, & Guardiani eorumdem mandato ad providendum sibi, & eidem Ecclesiæ de Pastore idoneo procedentes dilectum Filium Endridum ipsius Ecclesiæ Canonicum tunc absentem in suum & dictæ Ecclesiæ Archiepiscopum unanimiter & concorditer elegerunt; & ad præsentandum hujusmodi electionis decretum, & confirmationem ipsius a Sede Apostolicâ obtinendam Sigwactum, Audoenum, Johannem, & Thoriam ejusdem Ecclesiæ Canonicos Procuratores idoneos statuerunt, concessâ eisdem Procuratoribus nihilominus potestate, quòd si dictus Endridus non consentiret electioni hujusmodi de se factæ, vel aliàs ipsam contingeret annullari; Iidem Procuratores unum de se ipsis, vel etiam aliunde, prout expedire viderent, possent eligere, seu postulare in Archiepiscopum & Pastorem Ecclesiæ supradictæ. Verùm eodem Endrido hujusmodi electioni de se factæ, & sibi per Procuratores ipsos legitimè præsentatæ suum nolente præstare consensum; & renunciante omni juri, quod sibi ex eâ fuerat acquisitum; Sigwactus, Audoenus, & Thorias prædicti, eodem tamen Johanne eorum Comprocuratore absente, ad Sedem accesserunt prædictam Nobis humiliter supplicantes, ut eidem Nidrosien. Ecclesiæ providere de Pastore idoneo dignaremur, te Nobis ad hoc nihilominus idoneum nominando. Nos itaque de ipsius Ecclesiæ ordinatione sollicitè cogitantes, ne ulteriùs viduitatis incommodis subjaceret; ac cupientes illum ejusdem Ecclesiæ regimini per Nostræ providentiæ studium præsidere, per quem posset Ecclesia ipsa quoad spiritualia, & temporalia gubernari; ad te tunc Amaren. Episcopum direximus oculos Nostræ mentis, quem Nobis, & Fratribus Nostris de litterarum scientiâ, honestate morum, & vitâ, prudentiâ spiritualium, & temporalium providentiâ fide dignorum testimonia commendarunt; teque de prædictorum Fratrum Nostrorum consilio, & Apostolicæ plenitudine potestatis a vinculo quo eidem Hamaren. Ecclesiæ tenebaris, absolventes præfatæ Ecclesiæ Nidrosien. in Archiepiscopum præficimus & pastorem, firmâ spe, fiduciâ que tenentes, quòd eadem Ecclesia Nidrosien. per tuæ circumspectionis industriam præservabitur a noxiis & adversis; ac in spiritualibus, & temporalibus divinâ favente Clementiâ grata suscipiet incrementa. Quocirca Discretioni tuæ per Apostolica scripta mandamus, quatenus impositum tibi onus a Domino suscipiens reverenter, curam & administrationem ipsius Nidrosien. Ecclesiæ sic diligenter geras, & sollicitè prosequaris, quòd Ecclesia ipsa gubernatori circumspecto, ac fructuoso administratori gaudeat se commissam; & bonæ famæ tuæ odor ex laudabilibus tuis actibus latiùs diffundatur; & propter benedictionis æternæ præmium benevolentiæ Nostræ gratiam exinde pleniùs consequaris.

Datum Romæ apud Sanctam Sabinam xv. Kalendas Martii, Pontificatus Nostri Anno Secundo.