Description
-
Honorius IV (1285-1287)
-
Scrutentur, an expediat venditio nonnullorum prædiorum Ecclesiæ Reatinæ pro ære alieno solvendo; & si id quidem, venditio permittatur. (Ex Vatic. Reges. Pontif. epist. 200. anni 2.)
-
Anno 1286. die 9. Decembris.
-
1286
-
HONORIUS &c.
Dilectis Filiis ‥ Domus Prædicatorum, & ‥ Sancti Augustini Prioribus, ac ‥ Guardiano Minorum Fratrum Ordinum Reatin.a Sal., & Apost. Bened.
Lecta coram Nobis Venerabilis Fratris Nostri Andreæb Episcopi, & dilectorum Filiorum Capituli Reatin. petitio continebat, quòd venerabilis Frater Noster Petrus Montis Regalis Archiepiscopusc olim Episcopus Reatinusd unà cum Capitulo ipso Castrum Sancti Liberati Reatinæ Diœcesis pro mille & quingentis, & sexaginta florenis auri emerunt ad opus Ecclesiæ Reatinæ; ac certam partem hujusmodi pretii persolverunt, trecentis aliis florenis auri pro expensis necessariis factis in custodiâ, & reparatione ipsius Castri nihilominus persolutis. Cum autem prædicta Ecclesia sit adhuc in nongentos & septuaginta florenos auri occasione hujusmodi obligata: nec habeat in bonis mobilibus prædicta Ecclesia, unde possit ad præsens de hujusmodi pecuniæ satisfieri quantitate; iidem Episcopus & Capitulum Nobis humiliter supplicarunt, ut vendendi de Terris, possessionibus, domibus, & casalinis eidem Ecclesiæ minus utilibus usque ad quantitatem hujusmodi pecuniæ persolvendæ; ac convertendi in solutionem hujusmodi pecuniam, quam ex terris, possessionibus, domibus, & casalinis prædictis receperint; ut Ecclesia eadem ab hujusmodi onere debiti liberetur, licentiam benignè concedere dignaremur. Nos indemnitatibus ejusdem Ecclesiæ precavere volentes, & gerentes de probitate vessrâ fiduciam in Domino pleniorem, Discretioni vestræ per Apostolica scripta mandamus, quatenùs super præmissis vos omnes simul inquiratis diligentiùs veritatem; & si rem inveneritis ita esse; quòdque magis expediat ipsi Ecclesiæ vendere res prædictas, quàm Castrum dimittere memoratum, super quibus vestras intendimus conscientias onerare; vos de terris, possessionibus, domibus, & casalinis ejusdem Ecclesiæ minus utilibus usque ad quantitatem nongentorum, & septuaginta florenorum, vel circa, præfatis Episcopo & Capitulo, auctoritate Nostrâ vendendi, auctoritatem præstetis; sed vos quantitatem hujusmodi tàm in ejusdem pretii, quàm expensarum ipsarum solutionem, & non in usus alios convertatis; ita quòd exinde dignam Deo possitis reddere rationem; Nosque circumspectionem vestram dignis in Domino laudibus commendemus. Quod autem feceritis in hac parte, Nobis per vestras litteras fideliter intimetis. Non obstante Indulgentiâ &c.e
Datum Romæ apud Sanctam Sabinam v. Idus Decembris, Pontificatus Nostri Anno Secundo.
-
Bullarium Franciscanum romanorum pontificum, tomus III, n°LXXII., p.592
-
(a) Reatin.: De quo Fratrum Minorum loco dictum est in 1. hujus Operis tomo pag. 381. (f), & de Civitate ibi pag. 627. (d).
-
(b) Andreæ: Cujus mentio videatur apud Ughellum to. 1. Ital. Sac.
-
(c) P. Montis Regalis Archiepisc.: In Insula Siciliæ hoc anno vel superiore ad illam Ecclesiam translatus, de quo Lelius in Hist. Montis Regalis de X. Archiepisc. Petro Gerra.
-
(d) Episc. Reatinus. Anno 1278. constitutus ex cit. Ughello, & ex 47. epist. Nicolaii III. In Supremo &c. supra relata.
-
(e) Indulgentia &c.: Ut in Bulla 95. Nicolai III.