« bullarium-franciscanum-2390 »

HONORIUS &c.

Dilectis Filiis … Priori Prædicatorum, & … Guardiano Minorum Fratrum Ordinum Toletanoruma Salutem, & Apostolicam Benedictionem.

Dilectus Filius Ægidius Martini Cappellanus Noster, consanguineus fel. record. Johannis Papæ b prædecessoris Nostri exposuit coram Nobis, quòd olim idem Prædecessor, dum adhuc viveret, volens ut Præbenda, & Archidiaconatus, quos quondam Magister Raymundus de Peralta Archidiaconus, & Canonicus Toletanus, qui in Curiâ Romanâ decesserat, in Ecclesiâ obtinuerat Toletanâ, cum præstimoniis ad eum, dum viveret, de jure ibidem spectantibus per obitum ejus vacantes, per ipsius Prædecessoris providentiæ studium conferrentur; Præbendam, Archidiaconatum, & Præstimonia hujusmodi ex tunc donationi Apostolicæ reservavit, inhibens illis, ad quos illorum collatio pertinet, ne prætextu moderationis, quam piæ memoriæ Gregorius Papa Decimus prædecessor Noster super Beneficiis apud Apostolicam Sedem vacantibus post mensem per eorum Patronos, vel Ordinarios liberè conferendis ediditc, de Præbendâ, Archidiaconatu, & præstimoniis memoratis disponere præsumeret quoquo modo. Decrevit etiam idem prædecessor Noster Johannes irritum, & inane, si secus de ipsis per quoscumque scienter, vel ignoranter contigeret attemptari. Postmodum verò præfatus prædecessor Noster Johannes intendens eidem Cappellano gratiam facere specialem, Canonicatum ejusdem Ecclesiæ Toletanæ cum plenitudine juris Canonici, ac Præbendam, Archidiaconatum, & Præstimonia hujusmodi, ut præmittitur, vacantia, & donationi Apostolicæ reservata cum omnibus juribus, & pertinentiis eorum auctoritate Apostolicâ Cappellano contulit memorato; & provîdit de ipsis, ipsumque investivit præsentialiter de iisdem; decernens, prout erat, irritum & inane, si secus de ipsis, vel aliquo præmissorum post mortem supradicti Raymundi de Peralta, Apostolicâ, vel quâvis auctoritate aliquâ attentatum existerit, vel imposterum contigeret attentari; Non obstantibus contrariis consuetudinibus, vel statutis, seu certo Canonicorum numero juramento, vel confirmatione Apostolicâ, seu quacumque firmitate vallatis, aut si aliqui super receptione, ac provisione suâ de Canonicatibus, Præbendis, Dignitatibus, Porsonatibus, & Præstimoniis in eâdem Toletanâ Ecclesiâ ipsius prædecessoris Johannis, aut prædecessorum suorum Romanorum Pontificum litteras impetrarant; & tàm ipsi auctoritate illarum, quàm quivis alii motu proprio Archiepiscopi Toletani, qui fuerat pro tempore, seu Capituli Ecclesiæ memoratæ essent in eâ recepti, vel quòd reciperentur, instarent; & Canonicatus, Præbendas, Personatus, Dignitates, & Præstimonia in Ecclesiâ expectarent eâdem; quibus omnibus idem prædecessor Johannes Cappellanum ipsum in assecutione Canonicatus, Præbendæ, Archidiaconatus, & Præstimoniorum ipsorum præferri voluit; sed quoad alia nullum per hoc præjudicium generari; vel quod tunc Ecclesia ipsa Pastore vocabat; sive quòd idem Cappellanus in Ecclesia Ulixbonensi Canonicatum, Præbendam, Decanatum, ac in Bracharensi, & Bajocensid Canonicatus, & Præbendas, necnon Parochialem Ecclesiam S. Johannis de Portu Molarum Ulixbonen. Diœcesis obtinebat; seu Constitutione Concilii Generalise, & alia, quam bonæ memoriæf ‥ Sabinen. Episcopus tunc in illis partibus Apostolicæ Sedis Legatus contra obtinentes plura Beneficia noscitur edidisse; vel si aliquibus cujuscumque dignitatis, conditionis, ordinis, sive status communiter, vel divisim foret a præfatâ Sede indultum, quòd ad receptionem; vel ad provisionem alicujus minimè tenerentur; quòdque ad id compelli non possent; & quòd aliàs de Personatibus, Dignitatibus, Canoniisg, Præbendis, & Præstimoniis ad eorum collationem, electionem, provisionem, & dispositionem quamcumque conjunctim, vel separatim spectantibus non posset alicui provideri; sive quibuscumque privilegiis & indulgentiis Sedis ejusdem, per quæ ejusdem prædecessoris Nostri Johannis litteris non expressa, vel totaliter non inserta hujusmodi gratiæ impediri, vel differri posset effectus; & de quibus quorumcumque totis tenoribus de verbo ad verbum in litteris ipsis fieri deberet mentio specialis; vel si prædictus Cappellanus præsens non esset ad præstandum de observandis ipsius Ecclesiæ Toletanæ statutis, privilegiis, & consuetudinibus solitum juramentum, ad quod sæpedictus prædecessor Noster Johannes eumdem Cappellanum teneri voluit; dummodo illud per Procurarorem super hoc habentem ab eo speciale mandatum exhiberet, certis sibi super præmissis sub certâ formâ executoribus deputatis; sed confectæ super hoc ejusdem prædecessoris Johannis litteræ ad Bullamh, eodem prædecessore prævento morte, minimè pervenerunt. Verùm Ferrandus Roderici, qui tunc se pro Electo Toletano gerebati, Archidiaconatum, & Præstimonia Magistro Gofrido; Canonicatum verò, & Præbendam prædicta, ut prædicitur, præfato Cappellano collata Roderico Martini Canonico Burgensi de facto, cum de jure non posset, contra reservationem; inhibitionem, collationem, provisionem, investituram, & decretum præfata conferre præsumpsit; qui talis collationis prætextu ea detinent occupata in ejusdem Cappellani non modicum præjudicium, & gravamen. Quare idem Cappellanus Nobis humiliter supplicavit, ut cum ex collatione, ac provisione per eumdem prædecessorem Johannem de prædictis, ut præmittitur sibi factis plenum jus sibi confidat fore quæsitum; nec speret propter potentiam partis adversæ in partibus illis super præmissis posse assequi justitiæ complementum; & apud Sedem Apostolicam probationes paratas habeat, per quas suam intendit intentionem fundare; providere super hoc ei, faciendo sibi apud Sedem ipsam justitiæ plenitudinem exhiberi, misericorditer curaremus. Nos igitur ejusdem Cappellani supplicationibus annuentes Discretioni vestræ per Apostolica scripta mandamus, quatenus vos, vel alter vestrum per vos, vel alium, seu alios prædictos Magistrum Gofridum, & Rodericum, ac alios Archidiaconatus, Præbendæ, & Præstimoniorum prædictorum detentores, & illos etiam, qui sua crediderint interesse, auctoritate Nostrâ peremptoriè citare curetis, ut infra trium mensium spatium post citationem hujusmodi cum omnibus juribus, & munimentis suis, negotium hujusmodi contingentibus, per se, vel Procuratores ydoneos compareant coram Nobis facturi, & recepturi super præmissis, quod ordo dictaverit rationis. Diem verò citationis & formam, & quidquid inde feceritis Nobis per vestras litteras harum seriem continentes studeatis fideliter intimare. Non obstantibus indulgentiâ, qua vobis vel Ordinibus vestris dicitur ab Apostolicâ Sede concessum, ut non teneamini vos intromittere de quibuscumque negotiis, quæ vobis per litteras a Sede committuntur eâdem quæ de indulto hujusmodi plenam, & expressam non facerent mentionem.

Datum Romæ apud Sanctam Sabinam iv. Kalendas Decembris, Pontificatus Nostri Anno Secundo.