« bullarium-franciscanum-2281 »

MARTINUS &c.

Dilectis Filiis … Archipresbytero Majoris Ecclesiæ … Priori Prædicatorum, & Guardiano Minorum Fratrum Mediolanen. Sal., & Ap. Ben.

Dudum Monasterio Monialium Sancti Nicolai de Loco Sexto Johannea ad Romanam Ecclesiam nullo medio, ut dicitur, pertinente Ordinis Sancti Benedicti Mediolanen. Diœcesis Abbatissæ regimine destituto; dilectæ in Christo Filiæ … Priorissa, Conventus, ac dilecti Filii Petratius, & Petrus dictus Brentator Conversi ipsius Monasterii, ad quos communiter de antiquâ, & approbatâ, & hactenus pacificè observatâ consuetudine electio Abbatissæ ejusdem Monasterii pertinere dicitur, vocatis omnibus, qui voluerunt, debuerunt, & potuerunt commodè interesse, die ad hoc præfixâ pro futuræ Abbatissæ substitutione, prout moris est, convenientes in unum; & tandem per viam scrutinii procedere ad electionem hujusmodi eligentes, dilectas in Christo Filias Dariam, & Fraxiam ejusdem Monasterii Moniales suorum scrutatrices votorum concorditer elegerunt, quæ sua, & singularum de ipso Conventu, ac dictorum Conversorum vota secreto, & singillatim perscrutatæ, illa illicò dictis Conventui, & Conversis publicarunt. Et tandem collatione factâ zeli ad zelum, meriti ad meritum, & numeri ad numerum, comperto, quòd ex dictis Conventu & Conversis, qui erant decem numero, octo in Dariam; reliquæ verò Illaria scilicet in Riccam, & Jacoba in ipsam Illariam Moniales ejusdem Monasterii direxerant vota sua; præfata Fraxia suo & electarum, ac electorum prædictorum nomine ipsam Dariam in Abbatissam ejusdem Monasterii postulando elegit, & eligendo etiam postulavit. Postmodum autem, dictis Illaria, & Ricca electioni de se factæ recusantibus consentire; ipsa Illaria, & præfata Jacoba consenserunt electioni de dicta Daria celebratæ, quæ quidem Daria pòstmodum electioni de se factæ dicitur consensisse. Cumque postmodum prædictæ Conventus, ac iidem Conversi propter paupertatem quâ gravantur, ut asserunt, Nobis fecissent humiliter supplicari, ut examinationem negotii electionis hujusmodi alicui discreto committere curaremus. Nos hujusmodi negotii examinationem dilecto Filio Nostro G.b tituli Sanctæ Susannæ Presbytero Cardinali duximus committendam, & demum ab eodem Cardinali prædicto examinato negotio, attendentes, quòd vos de facto & facti circumstantiis habere poteritis notitiam pleniorem, Discretioni vestræ per Apostolica scripta mandamus, quatenus commissione hujusmodi per Nos dicto Cardinali facta nequaquam obstante; si vobis constiterit, quòd idem Monasterium ad dictam Romanam Ecclesiam nullo pertineat mediante, inquisitâ de modo electionis hujusmodi, Eligentium studiis, & Electæ meritis diligentiùs veritate, electionem ipsam, si eam inveneritis de personâ idoneâ canonicè celebratam, & aliud canonicum non obsistat; auctoritate Nostrâ confirmare curetis; facientes sibi a subditis suis obedientiam, & reverentiam debitam exhiberi, & per aliquem vicinum Episcopum gratiam, & communionem ejusdem Sedis habentem munus benedictionis impendi; recepturi &c.c

Datum apud Urbemveterem vii. Idus Jan., Pontificatus Nostri Anno Secundo.