« bullarium-franciscanum-2214 »

NICOLAUS &c.

Dilectis Filiis .... Abbati Monasterii Sancti Michaelis de Guamoa Lucanæ Diœcesis, & … Priori Prædicatorum, ac … Guardiano Minorum Fratrum Ordinum Lucan.b Sal., & Ap. Ben.

Exhibita Nobis dilecti Filii Guillelmi Antelminellic de Luca Plebani Plebis Massæ Piscatorum Pistorien.d Diœcesis petitio continebat, quòd ipse Plebanatum suum ejusdem Plebis, & dilectus Filius Orlandus Thomasiie Canonicus Ecclesiæ Lucanæ Canonicatum, & Præbendam, quos in ipsâ Ecclesiâ Lucana obtinet, ad invicem desiderant permutare; & quòd utilitati tàm dictæ Plebis, quàm ejusdem Ecclesiæ expediret quòd idem Orlandus Plebanatum ejusdem Plebis, & prædictus Guillelmus Canonicatum & Præbendam obtineret eosdem. Quare dictus Guillelmus Nobis humiliter supplicavit, ut permutationem hujusmodi de benignitate Apostolicâ fieri per discretum aliquem mandaremus; Nos itaque ipsius Guillelmi, quem per dilectum Filium Fratrem Fernandum Ispanumf Ordinis Fratrum Minorum de Litteraturâ examinari fecimus diligenter; & inventus est in illâ convenienter idoneus; supplicationibus inclinati Discretioni vestræ per Apostolica scripta mandamus, quatenus vos vel duo vestrum, per vos tantum, si tam eorumdem Guillelmi, & Orlandi quieti, quàm Plebis & Ecclesiæ prædictarum utilitati videritis expedire, de vitâ & conversatione ipsius Guillelmi & Orlandi, super quibus notitiam non habemus, inquirentes solerter, si eos bonæ conversationis & vitæ, ac eumdem Orlandum competentis scientiæ esse repereritis, & eis aliquod canonicum non obsistat, super quibus vestras intendimus conscientias onerare, a prædicto Guillelmo Plebanatus ejusdem Plebis, & ab ipso Orlando Canonicatus & Præbendæ, quos in Ecclesiâ ipsâ obtinet, cum ab eis fueritis humiliter requisiti, auctoritate Nostrâ liberâ resignatione receptâ, præfatum Plebanatum eidem Orlando, dictos verò Canonicatum & Præbendam memorato Guillelmo conferre, & assignare curetis. Inducentes eumdem Orlandum in ipsius Plebanatus, & prædictum Guillelmum in dictorum Canonicatus & Præbendæ corporalem possessionem, & defendentes inductos, ac facientes dictum Orlandum in Plebanum prædictæ Plebis ut est moris, admitti; dictum verò Guillelmum in eâdem Ecclesiâ ad dictam Præbendam in Canonicum recipi, & in Fratrem; & prædicto Orlando de ipsius Plebanatus; dicto verò Guillelmo de ejusdem Præbendæ redditibus & proventibus integrè responderi, Stallo in Choro, & loco in Capitulo ipsius Ecclesiæ præfato Guillelmo cum plenitudine juris canonici assignatis. Contradictores per censuras Ecclesiasticas appellatione postposisitâ compescendo. Non obstantibus quibuscumque contrariis statutis, & consuetudinibus Ecclesiæ & Plebis prædictarum, juramento, confirmatione Sedis Apostolicæ, aut aliâ quavis firmitate vallatis, seu si aliqui super provisionibus faciendis de Plebanatibus, Personatibus, Dignitatibus, & Præbendis, vel Beneficiis aliis in illis partibus generales, vel speciales a prædictâ Sede litteras impetrarunt, etiamsi ad inhibitionem, reservationem, vel decretum, sit earum auctoritate processum; vel si aliqui in prædictâ Ecclesiâ, Apostolicâ, vel aliâ quavis auctoritate in Canonicos sint recepti, vel ut recipiantur insistant, quibus per hoc quoad alios Plebanatus, Personatus, dignitates, Præbendas, & Beneficia, nullum volumus præjudicium generari, aut si aliquibus ab eâdem sit Sede indultum, quòd ad receptionem, vel provisionem alicujus minimè teneantur, quòdque ad id compelli, aut interdici, suspendi vel excommunicari non possint, & quòd de Plebanatibus, Personatibus, Dignitatibus, Præbendis, & Beneficiis ad eorum collationem, vel præsentationem, seu electionem spectantibus nulli valeat provideri per litteras Apostolicas non facientes plenam & expressam de indulto hujusmodi mentionem; sive qualibet aliâ ipsius Sedis indulgentiâ generali, vel speciali, cujuscumque tenoris existat, per quam præsentibus non expressam, vel totaliter non insertam effectus præsentium impediri valeat, vel differri, & de qua cujusque toto tenore de verbo ad verbum sit in Nostris litteris habenda mentio specialis; aut indulgentiâ &c.g Volumus tamen, quòd dictus Orlandus, prout ipsius Plebanatus cura requirit, ad Ordines se faciat statutis temporibus promoveri; & in eâdem Plebe residentiam faciat personalem: Alioquin hujusmodi gratia quoad ipsum Orlandum nullius penitus sit momenti. Nos enim ex nunc irritum decernimus & inane, si secus de hujusmodi Plebanatu, ac Canonicatu, & Præbendâ a quoquam contigerit attentari. Proviso, quòd super præmissis nulla penitus pravitas, vel aliquod aliud vitium intercedant.

Datum Viterbii Nonis Octobris, Pontificatus Nostri Anno Secundo.