« bullarium-franciscanum-1984 »

GREGORIUS &c.

Dilectis Filiis … Priori Prædicatorum, & … Guardiano Minorum Fratrum Ordinum Petragoricen.a , & … Archipresbytero Ecclesiæ de Dupla Petragoricen. Diœcesis Sal., & Ap. Ben.

Cum, sicut accepimus, Dilecti Filii Hugo de Rabeo Canonicus, & Helyas Sasomotus perpetuus Vicarius in Ecclesiâ seculari Sancti Asterii Petragoricen. Diœcesis Canonicatum, & locum, quos idem Hugo, ac perpetuam Vicariam, quam dictus Helyas in eâdem Ecclesiâ, in quâ non est certus Cononicorum numerus, nec distinctio præbendarum, obtinent, ad invicem permutare affectent; Nos ipsorum supplicationibus inclinati, Discretioni vestræ per Apostolica scripta mandamus, quatenus, si est ita, liberâ per vos, vel per alium, aut alios ab Hugone & Helya prædictis, Canonicatus, loci, & Vicaríæ prædictorum resignatione receptâ, Canonicatum, & locum prædicta eidem Helyæ, præfatam verò Vicariam eidem Hugoni auctoritate nostrâ, si ejusdem Ecclesiæ utilitas id exposcat, conferre, & assignare curetis; ipsosque in illorum corporalem possessionem inducatis, & defendatis inductos, facientes eumdem Helyam loco ipsius Hugonis in Canonicum, & in Fratrem; ac prædictum Hugonem ad prædictam Vicariam in perpetuum Vicarium in dictâ Ecclesiâ recipi, ac eis de illorum juribus, & proventibus plenariè responderi, dicto Helyæ Stallo in Choro, & loco in Capitulo cum plenitudine juris Canonici assignatis: Non obstantibus aliquibus ejusdem Ecclesiæ contrariis consuetudinibus, vel statutis juramento, confirmatione Sedis Apostolicæ, sive quâcumque firmitate aliâ roboratis; aut si aliqui super receptione, ac provisione suâ in eâdem Ecclesiâ specialiter, aut in illis partibus generaliter Nostras, vel Prædecessorum Nostrorum Romanorum Pontificum, seu Legatorum dictæ Sedis litteras impetrarunt, quibus per hoc nolumus quoad assecutionem aliorum beneficiorum aliquod præjudicium generari; seu si … Abbati, & Capitulo ejusdem Ecclesiæ a dictâ Sede indultum existat, quòd ad receptionem, vel provisionem alicujus minimè teneantur, & ad id compelli; sive interdici, suspendi, vel excommunicari non possint; aut quòd de beneficiis ad collationem suam spectantibus nulli valeat provideri per litteras Apostolicas, quæ de Indulto hujusmodi plenam & expressam non fecerint mentionem; sive quâlibet aliâ indulgentiâ dictæ Sedis, de quâ, cujusque toto tenore de verbo ad verbum oporteat in Nostris litteris specialem mentionem fieri; & per quam effectus hujusmodi gratiæ impediri valeat, vel differri; Contradictores per Censuram Ecclesiasticam appellatione postpositâ compescendo: Proviso, quòd super iis nulla prorsus pravitas intercedat. Quod si non omnes iis exequendis interesse potueritis, duo vestrum ea nihilominus exequantur.

Datum Lugduni viii. Idus Septembris, Pontificatus Nostri Anno Tertio.