« bullarium-franciscanum-1980 »

GREGORIUS &c.

Dilecto Filio Fratri Raymundo de Pennaforta Ordinis Prædicatorum Capellano Nostro Sal., & Apost. Bened.

Sua Nobis ‥ Magister, & Fratres Domus Sanctæ Eulaliæ Barchinonen. Ordinis S. Augustini, & Mercedis Captivorumb petitione monstrarunt; quòd ipsi dudum in domibus suis, quas ipsi in Civitate Tarraconen.c a longis retroactis temporibus obtinebant, Oratorium in honore, aut vocabulo ipsius Sanctæ; prout ex facultate concessâ ipsis ab Apostolicâ Sede licebat, de assensu bonæ memoriæ Tarraconen. Archiepiscopid construxerunt: Verum Guardianus, & Fratres Minores Tarraconen.e asserentes, quòd fel. record. Alexander Papa f prædecessor Noster ad instantiam Fratrum Minorum de Catalonia Vicensig, & Gerundensih Episcopis suis dederat litterisi in mandatis, ut nullum Religionis Monasterium, seu Oratorium Religiosarum personarum de novo ædificari, vel construi, aut Ecclesiam inibi in Religiosum locum, vel Regularem domum tranferri permitterent infra spatium trecentarum cannarum circa omnes fines locis prædictorum Fratrum Minorum contiguos, & vicinos; contradictores per censuram Ecclesiasticam compescendo: & quod iidem Magister, & Fratres hujusmodi Oratorium infra prædictum spatium loco eorum vicinum construxerant, eosdem Magistrum, & Fratres, petendo Oratorium destrui supradictum, coram eodem Vicensi Episcopoj; prout ex formâ litterarum ipsarum id se posse dicebant, traxerunt in causam. Ex parte verò prædictorum Magistri, & Fratrumk fuit coram eodem Vicensi, & excipiendo, propositum, quod cum ipsi præfatum Oratorium ante impetrationem prædictarum litterarum ad eosdem Episcopos obtentarum ex concessione Sedis prædictæ de consensu memorati Archiepiscopi construxissent; prout superius est expressum, & erant legitimè probare parati; Oratorium ipsum destruere prætextu earumdem litterarum, quæ non ad Oratoria constructa ante ipsarum impetrationem, sed ad ea, quæ postea construenda fuerant, extendebantur, prout ex earum formâ liquidò apparebat, nullatenus tenebantur. Et quia dictus Episcopus Vicensis dictos Magistrum, & Fratres super hoc audire contra justitiam denegans mandavit eisdem, ut prædictum Oratorium infra certum terminum destruerent; & campanam, quam habebant in eo, exindè removerent; alioquin in eos excommunicationis sententiam promulgabat; Magister, & Fratres prædicti scientes ex hoc indebitè se gravari ad Nostram audientiam appellarunt. Quocirca Discretioni tuæ per Apostolica scripta mandamus, quatenus vocatis, qui fuerint evocandi; & auditis hinc inde propositis, quod canonicum fuerit, appellatione remota, decernas; faciens, quod decreveris, per censuram Ecclesiasticam firmiter observari. Testes autem, qui fuerint nominati, si gratiâ, odio, vel timore se subtraxerint, censurâ simili, appellatione cessante, compellas veritati testimonium perhibere. Non obstante indulgentiâl, qua tibi, vel Fratribus tui Ordinis a Sede Apostolicâ dicitur esse indultum, quod non tenearis intromittere te de negotiis, quæ tibi a Sede committuntur eâdemm.

Datum Lugduni Idibus Augusti, Pontificatus Nostri Anno Tertio.