Description
-
Urbain IV (1261-1264)
-
Processum contra Bernardum Cornutum ab Inquisitore hæret. pravitatis Massilien. sibi transmitti jubet. (Ex Vaticano Regesto Pontif. epist. 158. tom. 3.)
-
Anno 1264. die 7. Maji.
-
1264
-
URBANUS &c.
Dilecto filio Fratri Maurinoa Ordinis Minorum Inquisitori hæreticæ pravitatis in Civitate Massilien.b Salutem, & Apostolicam Benedictionem.
Guillelmus dictus Cornutus Civis Massilien. in nostra proposuit præsentia constitutus, quod eo dudum ejecto a Civitate Massilien. pro devotione, quam habet ad dilectum filium nobilem virum Carolum Andegaviæ, ac Provinciæ Comitemc, tu ad inquirendum contra Bernandum Cornutum Patrem ipsius super hæretica pravitate procedens tandem Bernardum ipsum de consilio quorumdam inimicorum capitalium ipsius Guillelmi perpetuo carceri, confiscatis suis bonis omnibus, minus legitime condemnasti. Nos igitur de hujusmodi processu tuo certificari volentes, discretioni tuæ per Apostolica scripta præcipiendo mandamus, quatenus totum processum contra eumdem Bernardum habitum, in scriptis redactum, nominibus testium, qui contra eum deposuerunt, aliquatenus non expressis, ad Nos per fidelem Nuntium sub tuo sigillo, sublata qualibet difficultate, transmittas; & si te ad inquisitionem contra eumdem Guillelmum procedere forte contigerit, sic tuum studeas æquitate, ac justitia fulcire processum, ut idem processus nullam reprehensionis recipiat punctionem; nullamque idem Guillelmus justam habeat de te materiam conquerendi.
Datum apud Urbem veterem Nonis Maji, Pontificatus Nostri Anno Tertio.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CXLII., p.555
-
(a) Fr. Maurino: De quo redibit sermo ad epistolam 74., & 75. Clementis IV. Paupertatis altissimæ &c.
-
(b) Massilien.: Vulgo Marsiglia, ubi locus Fratrum Minor erat Caput Custodiæ sui nominis, & Provinciæ Gallicæ vulgo Provenza ex distributione Provinciarum, & Custodiarum Ordinis anno 1260. Narbone in Comitiis Gener. præside S. Bonaventura facta; ea fuit ejus antiquitas, etsi Waddingus nonnisi ad ann. 1290. num. 27. ejus meminerit.
-
(c) Provinciæ Comitem: Qui anno sequenti Rex Siciliæ, & Neapolis creatur.