« bullarium-franciscanum-1692 »

URBANUS &c.

Dilecto filio Fratri Gualteroa de Ordine FF. Min. Pœnitentiario, Cappellano, & Nuntio nostro Sal., & Ap. Bened.

Inter alias sollicitudines, quibus assidue premimur, cogitare Nos convenit; ut Ecclesiæ, ac illæ præcipue, quæ sunt Episcopali dignitate præditæ, in statu tranquillo, & prospero conserventur. Sane, Ecclesia Zagabrien.b Pastoris solatio destituta, Nos venerabilem Fratrem nostrum Timotheum Zagabrien. Episcopum, tunc Archidiaconum de Zala in Ecclesia Vesprimien., Subdiaconum & Cappellanum nostrum, Canonicum Zagabrien. Ecclesiæ de Fratrum nostrorum consilio, & Apostolicæ plenitudine potestatis præfecimus ipsi Zagabrien. Ecclesiæ in Episcopum & Pastorem, ac ei consecrationis munus duximus impendendum, injuncto Capitulo ipsius Ecclesiæ, & Clero Zagabrien. Civitatis, & diœcesis per litteras nostrasc, ut ipsi prædicto Episcopo tunc Electo tanquam Patri & Pastori animarum suarum devote intendere procurarent. Et licet prædictus Episcopus, sicut accepimus, quosdam Nuntios, & Procuratores suos ad eamdem Ecclesiam destinarit, qui usque ad adventum ipsius Episcopi ejusdem Ecclesiæ curam gererent diligentem; tamen ipsi non fuerunt admissid. Nos itaque cupientes, ut eadem Ecclesia salubribus proficiat incrementis, de tua circumspectione, quam in multis & arduis sumus expertie, confisi te pro ejusdem Ecclesiæ, & ipsius Episcopi procurandis, & expediendis negotiis ad partes Ungariæ duximus destinandum; & Procurationis officium ab eodem Episcopo tibi, ut asseritur, circa curam in spiritualibus & temporalibus dictæ Ecclesiæ commissum ipsius inclinati supplicationibus Episcopi approbantes eamdem curam circa ipsa spiritualia & temporalia usque ad beneplacitum ipsius Episcopi tibi auctoritate præsentium duximus committendam. Quocirca discretionem tuam rogamus, & hortamur attente mandantes, quatenus ad prædictas partes, & Ecclesiam personaliter cum gratia nostræ benedictionis accedens ejusdem Ecclesiæ sollicitam curam geras: Contradictores per censuram Ecclesiasticam appellatione postposita compescendo. Cæterum Castrum, Villas, possessiones, redditus, & alia bona Episcopalia tibi facias exhiberi, detentores eorum, & illos, quorum nomine detinentur, cujuscumque dignitatis, Ordinis, seu conditionis existant, ad eorum exhibitionem monitione præmissa per censuram eamdem sublato appellationis obstaculo compellendo. Non obstante, si est aliquibus ab Apostolica Sede indultum, quod interdici, suspendi, vel excommunicari non possint per litteras Apostolicas, quæ de indulto hujusmodi plenam & expressam non fecerint mentionem; sive qualibet alia indulgentia Sedis ejusdem, de qua, cujusque toto tenore de verbo ad verbum oporteat in nostris litteris plenam, & expressam mentionem fieri; & per quam effectus præsentium impediri valeat, vel differri. Preces autem, & mandatum nostrum sic adimpleat tua devotio, quod tibi proinde præter Divinæ retributionis præmium a Nobis digne proveniat actio gratiarumf.

Datum apud Urbem veterem x. Kalendas Februarii, Pontificatus Nostri Anno Tertio.