Description
-
Urbain IV (1261-1264)
-
Angliæ Regi scribit, ut annuum censum ab eo Romanæ Ecclesiæ pro 2. annis debitum Fr. Joanni Canciano O. M. persolvat. (Ex Archivo Vatic. Reg. Pon. p. 10. to. 2. an. 1.)
-
Anno 1261. die 13. Decembr.
-
1261
-
URBANUS &c.
Carissimo in Christo filio ‥a Illustri Regi Angliæ Sal., & Apost. Bened.
Honorem tuum, fili Carissime, decere credimus; ac tuis, & Regni tui profectibus expedire; ut quod juste debes Sacrosanctæ Romanæ Ecclesiæ Matri tuæ, sic promptus exsolvas; quod gratiam acquiras ex debito, & commendari mereatur celsitudo Regia ex affectu. Cum igitur census annuusb mille marcharum sterlingorumc a te Ecclesiæ Romanæ debitus pro duobus annis transactis usque ad festum Beati Michaelis præterito proximod computandis non fuerit persolutus; excellentiam tuam requirendam duximus, & affectione paterna rogandam, quatenus censum ipsum pro eisdem annis dilecto filio Fratri Joanni de Canciae Ordinis Fratrum Minorum has tibi litteras præsentanti nomine nostro, & Ecclesiæ ob reverentiam Apostolicæ Sedis, & nostram sublato dilationis, & difficultatis obstaculo prompta voluntate persolvas; ita quod, te matris justitiæ debitum hilariter exsolvente, Regiæ devotionis commendetur sinceritas; & gratia nostra tibi, Fratrumque nostrorum dilectio semper accrescat.
Datum Viterbii Idibus Decembris, Pontificatus Nostri Anno Primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XII., pp.430-431
-
(a) Filio ‥: Henrico III., qui ab anno 1216. regnare cœpit, annisque 56. Anglis imperavit.
-
(b) Census annuus: Ab Henrici patre Joanne an. 1213. positus, cum Angliæ Regnum Sedi Apostolicæ vectigalem constituit, de qua re conquesti sunt Angli anno 1245. in Concilio Lugdunen., quod ipsis invitis id factum assererent; & Eduardus Rex anno 1278. flagitavit, ut census ille a quibusdam Abbatiis, & Monasteriis Anglis ditissimis penderetur, sed non obtinuit.
-
(c) Mille marcharum Sterlingorum; Quorum quælibet Marcha 5. Florenis æquivalebat initio seculi xiv., etsi more nummorum modo pluris, modo minoris penderetur.
-
(d) Præterito proximo: Die 26. Septembris.
-
(e) Fr. Johanni de Cancia: De qua in epistola superiore no. (g) pag. 429.