« bullarium-franciscanum-1314 »

ALEXANDER &c.

Venerabili Fratri ...a Episcopo Parisien. Salutem, & Apost. Bened.

Cum adversus Ordinationis nostræ provisionem salubrem, quæ: Quasi lignum vitæ: incipit, super statu Parisien. studii, & nonnullis articulis illud contingentibus dudum de Fratrum nostrorum consilio promulgatamb Seculares Magistri, & Scholares Parisien. per duram rebellionis contumaciam in contemptum potestatis Apostolicæ calcitrantes, ex ipsa contra dilectos filios Fratres Ordinis Prædicatorum offensionis, & scandali materiam, quibusdam ad hoc cæteros instigantibus assumpsissent; tandem post culpas culpis adjectas, & contemptus contemptibus aggregatos, Nuncios, & Procuratores suos ad Sedem Apostolicam destinarunt, per quos ad excusandas excusationes ipsorum, quibus se munire contra prædictæ Ordinationis observantiam conabantur, plura fuere proposita coram Nobis. Nos vero eis plenius intellectis, excusationes, & allegationes, ac quascumque appellationes ipsorum, tamquam elusorias, ineptas, & frivolas de prædictorum Fratrum nostrorum consilio repellentes sententialiter decrevimus, ordinationem præfatam, & omnia, quæ continentur in ipsa, compositione, & aliis in contrarium allegatis nequaquam obstantibus, ab omnibus Magistris, & Scolaribus Parisius existentibus, cessante contradictione qualibet, integre & inviolabiliter observari; & Apostolica rescripta, quæ super ipsius ordinationis executione, vel observatione processisse noscuntur, habere sui roboris firmitatem. Insuper adjiciendo statuimus, ut Scholares omnes tam Religiosi de Prælatorum suorum licentia Parisius gratia Studii quomodolibet commorantes, quam etiam Seculares, ubicumque voluerint, lectionibus, vel prædicationibus audiendis, sive quæstionibus disputandis libere valeant interesse; utque tam Prædicatorum, quam Minorum Fratres, ac Religiosi alii, qui pro tempore Parisius Doctores fuerint in Theologica facultate, ac Scholares ipsorum in societatem, consortium, & Collegium aliorum Magistrorum, & Scholarium Parisius recipiantur plenarie; semperque in eis efficaciter habeantur: sicut ex literarum nostrarum, quæ incipiunt: Circa frequens &c.c inspectione tibi liquido innotescet. Quo circa Fraternitati tuæ per Apostolica scripta, in virtute obedientiæ, ac sub excommunicationis pœna, districte præcipiendo mandamus, quatenus præsentium, & litterarum ipsarum tenores, omni occasione, & dilatione postposita, per te, vel per alios Parisius solemniter publicans, ordinationem, literas, & statuta prædicta, & quæ continentur in eis, facias integre, & inviolabiliter observari, carissimi in Christo filii nostri Illustris Regis Francorumd ad hoc, si opus fuerit, auxilio invocato. Ne vero tantæ rebellionis vitium ulterius possit esse aliis occasio schismatis, & contumaciæ perniciosæ fomentum; omnes Magistros, & Scholares Seculares, & Auditores Parisius, qui expresse, ac publice non paruerint restitutioni dilectorum Fratrum Prædicatorum per fel. rec. Innocentium Papam IV., & postmodum per Nos factæ ordinationi, literis, sententiis, statutis, ac mandatis nostris infra unum mensem, postquam tenor præsentium, ut prædictum est, fuerit Parisius publicatus; omnibus dignitatibus, & Beneficiis Ecclesiasticis, ac officio Magistrali, prædicatione, ac doctrina privamus; ac imposterum reddimus omnino indignos, decernentes eos ab Ordinum executione, ac susceptione suspensos; eos quoque, qui occasione præsentium, aut aliarum literarum Sedis Apostolicæ pro dictis restitutione, & ordinatione servandis, seu occasione Parisiensis Studii directarum, ipsum Studium dissipare, aut turbare, seu alibi absque Sedis ejusdem speciali licentia contra tenorem ordinationis prædictæ transferre præsumpserint, excommunicationis vinculo innodamus; quos & tu per te, vel per alium excommunicatos denunties Parisius, & ubicumque videris expedire. Si qui vero, quod absit, prædicta non curaverint adimplere, aut alias in his contumaces fuerint, vel rebelles, seu quietis Scholarium, & Studii turbatores; tu eorum nomina, ut nominatim graviori pœna multentur, Nobis intimare procures; hoc ipsum supradicto Regi denuntians, ut ad bonorum pacem, malorumque terrorem eos, ut expedire viderit, coerceat, communicata sibi divinitus potestate. Juramenta quidem, aut obligationes quascumque a dictis Magistris, & Scholaribus, seu ab ipsorum aliquibus, & specialiter de non recipiendo ad Scholam, vel Scholasticam Societatem dictos Fratres Prædicatores, vel Scholares ipsorum Fratrum Regentium, sive alias præsumpta contra præfatam ordinationem nostram, aut aliqua eorum, quæ continentur in ipsa, seu contra statuta, vel mandata nostra, seu ipsorum aliquod, decernimus penitus non tenere. Non obstantibus appellationibus, aut occasionibus quibuscumque præteritis, vel futuris; aut etiam, quod a te dato super hoc executore a Nobis pluries appellasse dicuntur; sive processibus aliquibus, vel indulgentiis a Sede prædicta concessis, per quæ hujusmodi mandati executio impediri valeat, vel differri; aut de quibus plenam, & expressam, seu de verbo ad verbum fieri oporteat in præsentibus mentionem; seu etiam, quod dicti Fratres, quando consenserunt in compositione prædicta, renunciaverunt, ut dicitur, litteris Apostolicis impetratis, & impetrandis, quas in suo robore volumus permanere; ipsasque tibi, & eisdem Fratribus ab earum detentoribus reddi; quos ad id, si necesse fuerit, monitione præmissa per censuram Ecclesiasticam appellatione remota compellas; præceptum nostrum, quod ex toto cordis affectu tibi dirigimus, taliter impleturus, quod efficacis obedientiæ gaudeamus in te promptitudinem invenisse: Alias pro firmo teneas, quod indignationem nostram sub incursu prædictæ pœnæ contra personam tuam, licet ipsam in Christo sincerissime diligamus, graviter provocabis; literis nostris: Cunctis processibuse: Licet olimf: Ad nostram noverisg: tibi alias directis a Nobis, in suo robore nihilominus duraturis: contradictores per censuram Ecclesiasticam appellatione postposita compescendo: quod enim super hoc inveneris, & feceris, Nobis fideliter rescribere non omittash.

Datum Viterbii ii. Idus Julii, Pontificatus Nostri Anno Tertio.