Description
-
Alexandre IV (1254-1261)
-
Ut teneantur restituere eos Fratres, quos sine licentia Ministrorum de Ordine Minorum receperunt; & inhibentur in posterum admittere sub pœna excommunicationis. (Ex Regesto veteri Ord. fol. 44. apud Waddingum in Reges. Pontif. n. 22. Habetur Autographum Jaderæ in Archivo Cœnobii FF. Min. Observ. ex Gonzaga par. 2. Conv. 12. Provinciæ Dalmatiæ.)
-
Anno 1257. die 5. Februarii.
-
1257
-
ALEXANDER &c.
Dilectis filiis universis Abbatibus, Prioribus, Præpositis, Conventibus Monasteriorum S. Benedicti, Cistercien., S. Augustini, Præmonstraten., Camald., & Vallis Umbrosæa Ordinum Salutem, & Apostol. Benedictionem.
Vestram, & Ordinum vestrorum condecet honestatem, ut ordinatæ caritatis studio desudantes super iis, quæ tanquam ingrata vobis, & inimica refugitis, neminem offendere præsumatis. Hinc est, quod Nos dilectorum filiorum Fratrum de Ordine Minorum supplicationibus inclinati Universitati vestræ per Apostolica scripta in virtute obedientiæ districte præcipiendo mandamus, quatenus, si quos Fratres ipsius Ordinis absque suorum Ministrorum petita, & obtenta licentia recepistis, eidem Ordini sine dilatione, ac difficultate qualibet restituere studeatis. Nos ad præcludendam viam similia in posterum præsumendi auctoritate præsentium districtius inhibemus, ne prætextu literarum a Sede Apostolica generaliter obtentarum, seu obtinendarum, quæ de præsentibus plenam, & expressam non fecerint mentionem, in posterum dicti Ordinis Fratres professos sine præfata licentia in Ordinibus vestris aliquatenus admittatis; ac decernentes nihilominus irritum, & inane, quidquid per vos contra præceptum, & inhibitionem nostram super hoc contigerit attentari. Eadem auctoritate statuimus, ut præsumentes scienter contra hoc præceptum, & inhibitionem propria temeritate venire ipso facto sententiam excommunicationis incurrant; a qua non possint absolvi, nisi conspectui Sedis Apostolicæ se præsentent ab ea juxta ipsius providentiam absolvendi. Nulli ergo omnino hominum liceat hanc paginam nostræ constitutionis, & inhibitionis infringere, vel ei ausu temerario contraire; Si quis autem hoc attentare præsumpserit, indignationem Omnipotentis Dei, & Beatorum Petri & Pauli &c.
Datum Laterani Nonis Februarii, Pontificatus Nostri Anno Tertiob.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXC., p.193
-
(a) Vallis umbrosæ: Erunt, qui quærant, cur omissus sit Ordo Humiliatorum; cum tamen extet expostulatio Ministri Provinciæ Genuen. de Fr. Paulo Papien. ad illum Ordinem transfuga ex epist. 375. Innocentii IV. Dilecto filio ... Ministro &c. hujus Operis to. 1. p. 578. at id forsan factum, quod rarissimus esset nostrorum ad illum Ordinem transitus.
-
(b) Hæc Constitutio prodiit etiam anno 1261. die 4. Februarii ex speculo Minor., ut infra constabit, & hoc anno 1257., istoque die 5. Februarii missa est universis Prioribus, & Eremitis Augustinianis, ut ex sequentibus litteris.