Description
-
Alexandre IV (1254-1261)
-
Ut, si expedierit, nec aliis obsit, constituatur Episcopus Luvcovv. Fr. Bartholomæus Bohemus O. M. (Ex Archivo Vatic. in Reges. Pontif. epist. 311. ann. 3.)
-
Anno 1257. die 1. Februarii.
-
1257
-
ALEXANDER &c.
Venerabilibus Fratribus ...a Archiepiscopo Gnesnen., & ...b Cracovien. Salutem, & Apostol. Benedictionem.
Dilectus filius nobilis vir ...c Dux Cracoviæ & Sandomiriæ, & dilecta in Christo filia Salomead Monialis Ordinis Sancti Damiani quondam Regina Galliciæe soror prædicti Ducis, nec non ... Magister Domus Militiæ Templif in Alemania, & Sclavonia Nobis humiliter supplicarunt, ut Castrum Lucovvg Cracoviensis Diocesis ipsi Magistro & Fratribus Militiæ Templi a præfato Duce Cracoviæ & Sandomiriæ collatum, quod est in confinio Lataavorumh, & aliorum infidelium, statueremus esse de cætero Civitatem, & Ecclesiam Cathedralem ibidem erigere; ac ipsi Castro Episcopalem dignitatem concedere; necnon dilectum filium fratrem Bartholomæum de Boemiai Ordinis Fratrum Minorum, qui contra prædictos infideles pro negotio Fidei in illis partibus diligenter laboratj, in Episcopum & Pastorem inibi præficere; præsertim cum ad id tuus, Frater Episcope, qui loci Diocesanus existis, assensus accedat, & ex hoc Fidei Catholicæ cultus possit in illis partibus augmentari non modicum, Apostolica sollicitudine curaremusk. Nos igitur hujusmodi cultum Fidei cupientes per Orbem longius, latiusque diffundi, Fraternitati vestræ præsentium auctoritate committimus, quatenus præmissis omnibus provida meditatione pensatis; si hoc sine dilectorum filiorum Magistri & Fratrum Hospitalis Sanctæ Mariæ Theutonicoruml, & aliorum præjudicio fieri poterit; idque ad augmentum Fidei cognoveritis redundare; ordinetis, statuatis, ac faciatis auctoritate nostra super prædictis; prout secundum Deum incremento ejusdem Fidei videritis expedire. Contradictores per censuram Ecclesiasticam appellatione postposita compescendo.
Datum Laterani Kalendis Februarii, Pontificatus Nostri Anno Tertiom.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCLXXXVII., p.192
-
(a) Vener. Fratribus...: Fulconi ex Catalogo Antistitum Ecclesiæ Gnesnen.; & ex Bullis 150. & 154. supra relatis.
-
(b) Et ‥: Prandotæ, ut supra ex dictis Catalogo Ecclesiæ Cracovien., & cit. Bullis.
-
(c) Nobilis vir...: Boleslaus Pudicus satis notus, & in memoratis Bullis recitatus.
-
(d) Salomea: Jam pridem Beatorum Catalogo adscripta.: & de qua in epist. 96. Ex parte tua &c. anno 1255. data pag. 66. (b)
-
(e) Galliciæ: Al. Galatiæ, vulgariter vero Halitz, ut in no. (g) ad Bullam 150. paulo superius allatam.
-
(f) Militiæ Templi: Quæ jamdiu suppressa fuit, etsi longe, lateque diffusa.
-
(g) Castrum Lucow: In Innocentii IV. 576. epistola: Ad audientiam nostram &c. anno 1254. die 13. Julii scripta, & in 1. hujus Bullarii tomo edita p. 756. dicitur Provincia Luvcov inter Russiam, & Ducatum Cracoviæ sita.
-
(h) In confinio Lataavorum. Legendum Litvanorum, ut in epistola 92. anno 1255., & ad epist. 267. paulo ante relatam pag. 182. no. (a).
-
(i) Bartholomæum de Boemia: Alias de Praga, cujus est mentio in superiori epistola 286., & ad quem sunt plures hujus Pontificis litteræ supra relatæ ad ann. 1255. & 1256.
-
(j) Laborat: Juxta facultatem, & mandatum ei datum an. 1255. die 6. & 7. Augusti ex epistolis 92. & 93. eo anno, diebusque relatis.
-
(k) Curaremus: Jam anno 1254. Innocentius IV. mandaverat Abbati Mezanen. A. S. Legato, ut huic Castro, Provinciæque Lucow. præficeret aliquem ex Ordine Minorum: Nunc iterum ad preces supradictorum commissionem tribuit, & personam designat; sed neque id executioni datum unquam invenitur.
-
(l) S. Mariæ Theutonicorum: Qui in partibus illis potentes erant, & prope illas præcipuas Sedes habebant.
-
(m) Memorat hanc epistolam Raynaldus, eamque citat ex Regesto Vatic. in Annal. Eccles. ad hunc annum n. 21.