Description
-
Alexandre IV (1254-1261)
-
Ut Paganos ad Fidem Christi venire volentes contra quoscumque manuteneant, & defendant. (Ex Reges. Vatic. ep. 349. al. 350. apud Waddingum in Annal. Min. ad hunc annum n. 40. Raynaldum Annal. Eccles. num. 14.; & Bullarium Ord. Prædicat. tom. 1. Bul. 113. Alex. IV.)
-
Anno 1256. die 15. Julii.
-
1256
-
ALEXANDER &c.
Venerabili Fratri ‥ Episcopo Wratislaviensia , & dilectis filiis ... Priori Fratrum Prædicator. in Culmehachb , Fratri Bartholomæoc de Ordine Fratrum Minorum prædicatori Crucis contra Paganos Poloniæ Salutem, & Apostolicam Benedictionem.
Sicut dilectus filius nobilis vir Kasimirusd Cujaviæ, & Lanciciæ Duxe Ecclesiæ Romanæ devotus sua Nobis insinuatione monstravit; nonnulli Pagani, qui Jentuosif vulgariter in illis partibus appellantur, suarum terrarum contigui sponte cupiunt ad Fidem Christianam redire, ac se suæ subjicere ditioni; & fel. record. Innocentius Papa g prædecessor noster tibih, dilectoque filio nobili viro Bolezlavo Duci Cracoviæ, ac Sandomiriæi suis litteris dicitur concessisse, ut quoscumque Paganos eorum terris contiguos, vel confines, qui sponte, ac sine bello, & gladio vellent ad Christianam Fidem redire, ac suæ se subjicere ditioni, liceat eos recipere; ac sicut alios Christianos manutenere, protegere, ac etiam in omnibus defensare; non obstante concessione, qua dicebatur prius ab Apostolica Sede concessum dilectis filiis Fratribus Domus Teutonicorum partium earumdem, ut quos de partibus illis Paganos possent sibi bello, & gladio subjugare, suo dominio applicarent. Verum quia gratuita debet esse conversio, non coacta; & ipse Deus coacta servitia non acceptat; ipsius Ducis supplicationibus inclinati mandamus, quatenus dictos Paganos, & quoscumque alios sponte ad eamdem Fidem redire volentes contra quoscumque auctoritate nostra manuteneatis, & defendatis. Non obstante indulgentiaj, qua tibi fili Prior, vel Ordini tuo a Sede Apostolica dicitur esse concessum, quod tu, vel ipsius Ordinis Fratres de Causis cognoscere inviti minime teneamini, quæ vobis a Sede committuntur eadem. Quod si non omnes his exequendis potueritis interesse, alter vestrum ea nihilominus exequatur.
Datum Anagniæ Idibus Julii, Pontificatus Nostri Anno Secundok.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXIX., p.148
-
(a) Episcopo Wratislavien.: Thomæ, de quo non semel in Annal. Eccles. Raynaldi, Episcopo scilicet præcipuæ Civitatis Slesiæ hoc anno inhumaniter carceri dato a Boleslao Slesiæ Duce ex autoribus apud cit. Ravnaldum ad hunc ann. n. 9., & seqq.
-
(b) In Culmehach: Seu Culmia Prussiæ Regalis, sive Poloniæ Civitate: in Bullario O.P. additur & contra codicem Waddingi, ex quo tamen exscriptum fuit; sed leg. in Culmia, ac Fratri Bartholomæo &c., notum est enim, temporibus illis conjunctionem copulativam, ac a nonnullis scriptam esse cum aspiratione h, sicut & articulus hic, & hæc sine ea interdum, & ach loco ac.
-
(c) Fr. Bartholomæo: De Bohemia, uti vocatur in binis hujus Pontificis Epistolis ad eum dat. anno 1255. die 6. & 7. Augusti: quibus constituitur prædicator Crucis in Polonia, Bohemia &c.
-
(d) Kasimirus: Mendose apud cit. Raynaldum dicitur Kasoturus.
-
(e) Cuiaviæ, et Lanciciæ Dux: Est Cujavia Regni Poloniæ Provincia inter Prussiam, & inferiorem Poloniam, cujus caput Uladislavia; Lancicia vero urbs inferioris Poloniæ Palatinatus cognominis caput, quam ferunt anno 1656. incensam fuisse.
-
(f) Jentuosi: Jentuisones dicuntur in prima prædictarum epistolarum Pontificis ad Fr. Bartholomæum Bohemum, ut supra pag. 63. (g)
-
(g) Innocentius Papa: Nempe IV. anno 1253. per litteras Cum sicut te intimante &c. dat. 4. Kalend. Junii anno x., quas refert Raynaldus in Annal. Eccles. ad eum annum n. 25.
-
(h) Tibi: Legendum sibi sc. Casimiro memorato, ut apud Raynaldum cit.
-
(i) Boleziavo Duci Cracoviæ, ac Sandomiriæ: B. Salomeæ Fratri, qui tandem istos paganos armis debellavit; & delevit anno 1264. ex Duglosso l. 7.
-
(j) Indulgentia: Gregorii IX. anno 1227. Paci vestræ &c. postea ab aliis Pontificibus confirmata, ut in Bullario etiam Ordinis Prædic.: Hæc autem usque ad finem apud cit. Raynaldum non leguntur, exceptis Datum &c.
-
(k) De eadem ferme re sunt litteræ Exhibita nobis anno insequenti datæ die 5. Januarii, quæ infra consuli possunt.